Diyarname

Mele Kerem Soylu ku duh wefat kir îro bi merasimekê cenazeyê wî ji Stenbolê şandin Melezgira Mûşê.

Li Uhud Camî ya Kiraça Stenbolê bi merasimekê cenazeyê Mele Kerem Soylu şandin ser axa bav û kalên wî. Di merasimê de Mebûsa BDP'ê Sebahat Tuncel, Hevserokê BDP'a Stenbolê Emrullah Bingol, Hevserokê HDP'a Stenbolê Şamil Altan û rêveberên partiyê, Serokê Enstîtuya Kurdî ya Stenbolê Sami Tan û rêveberên Enstîtuyê, Serokê Weqfa Îsmaîl Beşîkçî Îbrahîm Gurbuz, Serok û rêveberên komeleya meleyan DİAYDER, xebatkarên rojnameya Ozgur Gundemê, nivîskar Çiya Mazî, Cemil Oguz, dengbêjên kurd Sebrî Agirî, Zahiro, Xeniyê Qereyazî û li dor hezar kesî amade bûn.

Di merasimê de kurê Kerem Soylu Cesim Soylu qala bavê xwe kir, qala têkoşîna wî kir û da zanîn ku ew li ser rêça wî xebata xwe didomînin. Soylu got ku bavê wî berî wefatkirinê gotina wî ya dawî dîsa pirsa rewşa Rojava, Kobanî, Şengalê bû.

Mebûsa HDP'ê Tuncel jî da zanîn ku ev 15 sal in ew Mele Kerem Soylu nas dike, diyar kir ku ji bo çavên wî li dû nemînin ew dê zêdetir xwedî li têkoşîna wî derkevin.

Piştî axaftinan cenaze ber bi gundê Nurdon a Melezgîra Mûşê ve hate bi rê kirin.

KCD ji bo malbatê sersaxî xwest

Kongreya Civaka Demokrat li ser wefata Mele Kerem Soylu peyameke sersaxiyê weşand û got: "Me, wefata hevalê me yî Mele Kerem Soylu bi xemgînî bihîstiye. Mele Kerem ku emrê xwe di kar û xebata welatperweriyê de, di nava pêşketina  ziman û perwedehiyê û xebata kurdewariyê de, ji aliye olî û rewşenbiriyê de derbaskiriye, ji nişke ve çûye ser dilovaniyê xwe. Em hêvî dikin ku armanc û xeyalên Mele Kerem di tekoşîna azadiya Kurdistanê de wê her bijî. Bi van hestan, em di serî de ji malabata wî re sersaxî dixwazin û dibêjin bila serê malbatê û gelê kurd sax be."

***

Nûçeya eleqedar:

- Mele Kerem Soylu wefat kir