Diyarname
Nûbiharê û Weqfa Zehrayê di vê meha Remezanê de bi hev re fitarek organize kirin. Gerînendeyê Weşanê yê Nûbiharê Suleyman Çevîk got, "Piştî 33 salên xebata li ser kurdî heqê me heye em banga xwedîlêderketina kurdî bikin."

Fitar li saloneke dawetê ya li Bahçeşehîra Stenbolê li dar ket. Bi sedan kes beşdarî fitarê bûn. Pêşî Quran hat xwendin, dûre axaftin hatin kirin.

Gerînendeyê Weşanê yê Nûbiharê Suleyman Çevîk axivî, qala fitarên ku heta niha li cihên cur bi cur çêkirine kir û kêfxweşiya xwe ji bo vê yekê anî ziman ku gelek mirov tên ba hev.. Dûre ji ber ku îro rastî salvegera Komkujiya Helebçeyê dihat, Çevîk qurbaniyên Helebçeyê bibîr anîn.
Suleyman Çevik di axaftina xwe de li ser sê xalên sereke sekinî û got, "Gere îtîfaqe me hebe. Partiya wî, rêxistin, fraksiyon çi dibe bila bibe gere deyne aliyekî û gere em ji hev hez bikin. Ev yekbûna me, tifaqa me ye. Dema ji hev hez bikin em miletek in. A din jî ziman e. Ev 33 sal in em bi zimanê kurdî xebatê dikin. Heqê me heye em ji we daxwaza parastina ziman bikin. Ziman parçeyek bedena însan e, ne çakêtek e em derxin. Ziman nasname ye, ziman nasnameya miletekî çêdike, ziman şiûra neteweyî ye. Tu wê bikar neynî, tu bi zimanê xwe xeber nedî, ew şiûra te ya neteweyî jî radibe. Ya din jî Xwedî li weşanxaneyên kurdan derkevin. Weşanxaneyên kurdan ji bo xwendekarên dersa kurdî hilbijartine kampanyaya pirtûkan daye dest pê kirin. Em jî piştgiriya vê bikin. Me bi xwe 5 hezar pirtûk dan emê bdin jî. Daxwaza me ew e hûn jî xwedî derên."
Dûre li ser navê Weqfa Zehrayê ji rêveberên wan Abdullah Şahin û Muhittin Zinar jî li ser girîngiya rojê axivîn.
Piştî fitarê dengbêj Mihemedê Beyro û Sebrî Agirî bi klamên xwe reng dan şevê.

Gerînendeyê Weşanê yê Nûbiharê Suleyman Çevîk banga îtîfaq û hezkirina hev kir.