DiyarName.Com

'Em ji mala xwe dest pê nekin, em nikarin ji kesî gazin bikin'

Diyarname
Enstîtuya Kurdî ya Stenbolê, NÇM û Platforma DGD'ê bi hev re li salona Navenda Çanda Mezepotamyayê (NÇM) şahiyek ji bo Cejna Zimanê Kurdî li dar xist. Hevseroka Enstîtuya Kurdî ya Stenbolê Remziye Alparslan go, "Em nehêlin zarokên me bi zar û zimanê biyanî mezin bibin", Serokê Platforma DGD'ê Abdulhakim Daş jî got, "Em li mal kurdî xeber nedin, ji mal xwe dest pê nekin, em nikarin ji kesî gazin bikin."
Şahiya saziyan a ji bo Cejna Zimanê Kurdî li salona NÇM'ê li dar ket. Piraniya beşdaran ciwan bûn û salon tije bû. Di şahiyê de helbest hatin xwendin, 'etar'an zûgotinok û tiştanok gotin û ji temaşevanan pirsin, her wiha hunermend Diljen Ronî jî bi stranên xwe reng da şevê.
'BILA ZAROKÊN ME WEKÎ ZAROKÊN BIYAN MEZIN NEBIN'
Hevseroka Enstîtuya Kurdî ya Stenbolê Remziye Alparslan axivî û got ku bêyî azadî pêk were zimanê me jî azad nabe û wiha dom kir, "Heta gelê kurd azad nebe ziman jî azad nabe. Ji ber ku ewê her pêşî li zimanê me bigirin, bêhna me biçikînin. Bi 'Doza Kobanî' xwestin û dixwazin qadê li me teng bikin. Hesasiyeta me ya ziman heye. Bi zarokên xwe re bi kurdî biaxivin, bila zarokên me wekî zarokên biyan mezin nebin. Nehêlin zarên me bi zar û zimanê biyanî mezin bibin."
'GERE EM JI NAVA MALÊ DEST PÊ BIKIN'
Serokê Platgorma DGD'ê Hekîm Daş jî got ku ji bo ziman û yekîtiyê gere em têkoşîna xwe xurtir bikin û got, "Êdî li malan tirkî tê axivîn. Kal û pîr nikarin bi neviyên xwe re bi kurdî biaxivin, ji ber ku nevî bi kurdî nizanin. Gere em nehêlin ziman tüne bibe. Gere em ji nava mala xwe dest pê bikin. Em vê nekin, em nikarin ji kesî gazin bikin."
Hunermend Sebrî Agirî jî axaftina sipasiyê kir û got, "Em li ku dibin bila bibin em bi zimanê xwe karê xwe bikin."