Diyarname

Niha pirtûka 'Don Quijoteyê La Manchayî kî ye?' li ber destên me ye. Pirtûka ku ji Weşanên Morî Zarok derketiye ji bo zarokan e û ji bo dê û bav ligel zarokên xwe bi dengek bilind bixwînin, û helbet carinan jî pê bikenin.

'Don Quijoteyê La Manchayî kî ye?' ji berhema navdar a nivîskarê spanyolî Cervantes hatiye girtin. Rosa Navarro Duran ji romana nivîskarê navdar honandiye. Orjînala pirtûka li ber dest di sala 2015'an de li Spanyayê hatiye çapkirin. Miqedes Akin jî ew ji spanyolî wergerandiye kurdî.

Çîroka pirtûka li ber dest wisa dest pê dike, "Ev çîrok berî gelek salan, bêtirî çar sed sal berê, li gundekî La Manchayê qewimiye. Li wir camêrekî bi navê Alonso Quijano hebû. Wexta her tiştî dest pê kir ew pêncî salî bû. Bihêz, dirêj û gelekî lawaz bû. Dixwest sibehan zû rabe û biçe nêçîrê. Lê tu dizanî kêfa wî herî pir ji çi re dihat?"

Bi vî awayî çîroka pirtûkê dest pê dike û didome.

- Don Quijoteyê La Manchayî kî ye? / Weşanên Morî / tîrmeh 2023 / 144 rûpel