AMED

Rêveberên MED-DER'ê diyar kirin ku ji bo serlêdanên qursên zimanê kurdî yên serdema nû 3 roj mane û xwestin yên bixwazin serî li van qursan bidin. 

Komeleya Lêkolînên Ziman û Çandê ya Mezopotamyayê (MED-DER) bibîr xist ku serlêdanên qursên rû bi rû û onlîne didomin. Piştî qeydên ku dê heta 12'ê reşemiyê bidomin, dê ders roj 20'ê reşemiyê dest pê bikin. Rêveberên MED-DER'ê li ser mijarê agahî dan MA'yê.

BI KURMANCÎ Û KIRMANCKÎ

Rêveberê MED-DER'ê Mazhar Aktaş bibîr qurs bi zaravayên kurmancî û kirmanckî/zazakî tên dayîn û wisa gotiye, "Ger daxwaz hebe dê bi zaravayê soranî ders bên dayîn. Ji ber vê yekê banga me ev e; Eger kesek bixwaze soranî fêr bibe dikare serî li me bide."

‘DIVÊ KURD XWEDÎ LÊ DERKEVIN'

Aktaş got, "Li ser zimanê kurdî polîtîkayeke mezin a asîmîlasyonê tê meşandin" û ev yek lê zêde kir: “Li hemberî vê polîtîkayê divê kurd xwedî li zimanê xwe derkevin. Ev ne tiştekî siyasî an jî polîtîk e. Mirov dixwaze bi zimanê xwe binivîse, biaxive û bigirî. Ev daxwazeke xwezayî ye, tu eleqeya wê bi siyasetê re nîn e. Çawa ku her enstruman bi dengê xwe tê naskirin, kurd jî bi zimanê xwe tên naskirin û dikare xwe îfade bikin."

VEKIRINA POLAN

Hacî Ozkal ev agahî dane: “Dema qeyda 10-20 kesan ji bo her polê temam bibe dê pola nû bê vekirin. Di kursa me de; ders ji pênc astan pêk tê; destpêk, asta yekem, duyem, sêyem û asta mamostetiyê." 

Ozkal jî dibêje, “Li hemberî vê asîmîlasyonê divê em dev ji parastina zimanê xwe bernedin." û gotiye: "Divê ziman tenê bi qursan sînordar nemîne, li malê, li kuçe û kolanan û di her warê jiyanê de were axaftin."