Diyarname

Li Bakur û Rojhilatê Sûriyeyê 43 hezar û 66 mamosteyên dibistanên seretayî, navîn û amadeyî, amadekariyên sala nû ya perwerdeyê dikin. 

Desteya Perwerdeyê ya Rêveberiya Xweser a Bakur û Rojhilatê Sûriyeyê her sal havînê, bi armanca salek bihêztir a perwerdeyê, ji bo mamosteyan dersên branşan û semîneran organîze dike. Îsal jî bi heman armancê li tevahiya herêmên xweser semîner hatin organîzekirin. Di çarçoveya biryara giştî de, desteyên perwerdeyê yên her herêmekê (Cizîr, Firat, Efrîn-Şehba, Reqa-Tebqa-Dêra Zor) li gorî şertên xwe plansaziya semîran derxistiye û pêk tînin.

Li gor nûçeya ANHA'yê semînerên ku ji destpêka vê mehê ve hatine destpêkirin, li ser mijarên sazûmanî, pêwendî û felsefeya perwerdekirinê tên dayîn. 

43 HEZAR Û 66 MAMOSTE

Li her herêmekê komîsyon hatine avakirin û li bajarok, navçe û bajaran semîneran didin. Li gorî agahiyên ku rayedarên Desteya Perwerdeyê ya Rêveberiya Xwesar dane, li tevahiya herêmê 43 hezar û 66 mamosteyên dibistanên seretayî, navîn û amadeyî tevlî van semîneran dibin. Ji bilî mamosteyên rêveberiyên dibistanan, rêveberiyên perwerdeyên bajaran û desteyên perwerdeyê jî tevlî semîneran dibin.

300 KOMÎSYON AVA KIRINE

Endamê Komîteya Perwerdeyê ya Desteya Perwerde û Fêrkirinê ya Herêma Cizîrê Rênas Fetah destnîşan kir ku wan li Cizîrê ji bo semîneran derdora 300 komîsyon ava kirine, destpêkê perwerdehiyî dane van komîsyonan, piştre jî dest bi dayîna semîneran kirine. Rênas Fetah diyar kir ku armanca wan ew e ku bi semîneran sîstema perwerdeyê baştir bidin fêmkirin û pêkanîn.

Semîner heta dawiya mehê dê bidomin.

(Foto ji arşîvê ye)