Stenbol
Di çarçoveya "Şîrê Dibistanê" de îro şîrên ku li dibistanên 9 bajaran hatin belavkirin bûn sedema nexweşketina bi sedan zarokan.

Ji bo zarokên dibistanên seretayî şîr vexwin projeya "Şîrê Dibistanan" hatibû dest pê kirin û bêpere li zarokan şîr dihat belavkirin. Di îhaleyê de hin şîrket bi ser ketibûn û wan şîr belav dikir. Lê îro şîrên ku hatin belavkirin bûn sedema nexweşketina zarokan.
Li bajarên wekî Amed, Konya, Edîrne, Edene, Sêwas, Kirikkale, Sakarya, Antalya û Samsumê bi sedan zarok ji ber vî şîrî nexweş ketin. Li Amedê bi ser 50 zarokî re ji ber şîr bi jehrê ketin û rakirin nexweşxaneyê.
Hate îdîakirin ku şîrê li Edeneyê hatiye belavkirin dîroka roja dawî ya bikaranînê 2005 bûye.

Wezareta Çandiniyê ya Tirkiyeyê got ku ji şîr nimûne hatine girtin û şandine analîzê.

Serokê Egîtîm Sena Edeneyê Ayhan Firtina li ser meseleyê ji bo CNNTurkê wisa axivî: "Hikumetê ev kampanya veguhast meseleya şovê. Me wekî Egîtîm Senê 2 sal berê got 'ji bo dibistanên me piştgirî, ji bo zarokên me şîr' û daxwaz kir. Piştî 2 salan belavkirina şîr a ji bo zarokan tiştek dilxweş e lê li hemberî vê fiyaskoyê divê dewlet lêpirsîneke cidî bide dest pê kirin. Niha li Edîrneyê li dibistaneke me ji 30'î zêdetir zarokên me li nexweşxaneyê ne. Ev şîr îro hatine dibistanê, loma kêmasiya dibistanê nîn e. Dewletê xwest bi vê meseleyê şov bike, lê divê ev mesele hinek din bi baldar bihata meşandin. Em nefikirîn ku dê dewlet rantê bide şîrketan, ew jî dê şîrê zêde bikar bînin. Hikumet di vê meseleyê de têk çûye."