Cuma Mihemed / Kobanî
Di 29'ê avrêlê de çalakiyên Hefteya Wêjeyê bi dewreya Melayê Cizîrî hate destpêkirin. Tê de rewşenbîr, nivîksar, helbestvan û kesên li Bakur û Rojhilatê Sûriyeyê girîngiyê didin wêjeyê beşdar bûn. Ev çalakî heta duh dewam kirin û tê de gelek mijarên girêdayî wêjeyê hatin nîqaşkirin.
Di Hefteya Wêjeyê de rexnegiriya wêjeyê ji aliyê ast û bandora wêjeyê hatin nîqaşkirin. Li kêleka wê jî gelek helbest û çîrok bi zimanên erebî û kurdî hatin xwendin.
′PÊŞEROJA WÊJEYA KURDÎ DI PÊŞKETINÊ DE YE′
Nivîskar Merwan Berekat ku beşdarî çalakiyên Hefteya Wêjeyê bûye û semîner li ser ′Roman û Modernîte′ di çalakiyên roja sêyemîn daye wiha got: "Wêje rihê gelan e. Dema mirov bixwaze her gelekî nas bike û asta pêşketina zihniyeta wê nas bike, divê wêjeya xwe bixwîne."
Berekat wiha domand: "Ji lew re em dibînin ku lidarxistina mîna van çalakiyan li Rojava bi navê Hefteya Wêjeyê, bê guman tiştekî balkêş e û cihê qîmetdayînê ye. Kesên beşdar dibin û dixwazin asta wêje bizanin û semînerên cur bi cur bişopînin cihê sûdweriyê ye. Em li vir sûdwar in û sûdê didin."
Li ser bersivdana pirsa wêjeyê li rojavayê Kurdistanê di çi astê de ye Merwan Berekat wiha pê de çû: "Bê guman di vê demê de nirxandineke temam çênabe. Ji ber ku pênûsa renxengeriyê neketiye wêjeya kurdî û wergerandinê. Lê bi nêrîna min, pêşeroja wêjeya kurdî li Rojava rojane pêş dikeve. Têkiliya vê jî bi rewşa niha re û encamên şoreşê hene. Pênûsa azad û her kesek wekî dixwaze dinivîse."
Berekat wiha dawî li gotina xwe anî: "Ya balkêş û dihêle ez serbilind bim, ew e ku piranî berhemên wêjeya cur bi cur bi zimanê kurdî tê nivîsandin û pirtûkxaneya kurdî dewlemend dike. Bê guman pêşerojeke pêşketî li benda me ye û me kêfxweş dike."
′BANGÊN KU ÇALAKÎ WERIN BILINDKIRIN′
Li aliyê din jî helbestvan Ehmed Yûsif û Hevserokê Yekîtiya Rewşenbîran a Minbicê got: "Çalakiyên wêjeyî yên li Bakur û Rojhilatê Sûriyeyê tên lidarxistin tevgereke pir erênî ye. Ew yek piştî êşên li van herêman di aliyên siyasî û leşkerî de û êrîşa çandî çêbûn, pêk hat. Divê ev tevgera wêjeyî bi awayekî xurt hebe. Em ê tiştên hatin xerabkirin sererast bikin."
Yûsif wiha domand: "Me desthilatî bi hemû qonaxên wê jiya, çi beriya 50 salî di gel netewe-dewletê û rejîma dîktatorî û çi jî komên tundraw ên ku di ser van herêman re derbas bûne. Vê yekê bandoreke neyênî li ser çanda vê herêmê çêkir. Ji lew re divê em berpirsiyar bin û çalakiyên çandî bi pêş bixin da ku bigihînin civakeke rewşenbîr."
Ev dewreya duyemîn a çalakiyên Hefteya Wêjeyê ye ku li herêmên cuda yên Bakur û Rojhilatê Sûriyeyê tê lidarxistin. Par li Qamişloyê hate lidarxistin.
***
Nûçeya Eleqedar:
.jpg)
.jpg)
