Diyarname

Maçeke balkêş hat lîstin. Maça yekem a çarîk fînalê 120 deqe dom kiribû û çûbû penaltiyan. Maça duyem, yanî ya di navbera Arjantîn û Hollandayê de jî wekî ku bibêje ma çi yê me kêm e 120 deqe dom kir û paşê derbasî penaltiyan bû. Arjantîn carek din bi penaltiyan li hemberî Hollandayê bi ser ket.

Heta wê çaxê çi qewimî? Bi kurtahî:

Heta niha her du tîm 9 caran di kûpayê de hatibûn hemberî hev. Hollanda 4 caran bi ser ketibû, 4 wekhevî, tenê carek Arjantîn bi ser ketibû, ew jî saa 1978’an de. Sala 2014’an, di nîv fînalê de dema her du hatibûn hemberî hev maç bi penaltiyan bi dawî bûbû û Arjantîn bi ser ketibû. Niha carek din bi penaltiyan Arjantîn bi ser ket.

Di vê maçê de deqîqeya 35’an de Nahuel Molina bi pasê mikemel ê Messi encam diyar kir: 1-0. Nîveka yekemîn wisa bi dawî bû. Di deqîqeya 73’yan de Arjantînê penalti bi dest xist û Messi temam kir: 2-0.

Arjantîn bi vê hê bi xwe bawer bû, lê Hollanda gelek cidî bû. Ne karê henekan e, her serdest bûye li hemberî Arjantînê. Di deqîqeya 83’yan de bi gola Wout Weghorst got, “Ez hê li vir im”. Û deqe 90+11… Hollanda dê li ber kelehê re lêdaneke çêbike. Arjantîniyan bendek xurt çêkirine, lê ka kî dizanî dê lîstikvan lê nede, bendavê belav bike û pasê bide. Erê, gavek gelek hêsan bû, lê taktîkek mikemel bû. Û gol. Navê golê dîsa Wout Weghorst. Maç derbasî 30 deqîqeyê zêde bû.

Di vê dema zêdek de tu guherîn çênebû û maç derbasî penaltiyan bû. Hollandayê vê carê bi penaltiyan dê heyfa hilda yan na? Pêşî mafê bikaranîna penaltiyan di destê Hollanda de bû. Ji lîstikvanên wan V. Van Dijk gog girt dest, lê qeleparêzê Arjantînê E. Martinez nehişt ew golê biavêje.

Dûre Messi hat, carek din penaltî veguhart golê. Vê carê ji Hollandayê Steven Berghuis jî hat, wî jî nikarî penaltiyê veguherîne golê û Arjantînê hem moraleke mezin, hem avantajeke mezin bi dest xist. Û encam: Bi 4-3 penaltiyan, bi temamî bi 6-5 Arjantînê reqîbê xwe têk bir û derbasî nîv fînalê bû. 

BO MESSI

Û Messi helbet paragrafek heq dike. Kaptanê Arjantînê gelek dixwest bi ser bikeve. Di muzeya wî de ji bilî Kûpaya Cîhanê hemû kûpa hene. Loma jî ji hemû lîstikvanan zêdetir dixwest û bi vî awayî dilîst jî. Her ku gog digihîşt ber wî 2-3 lîstikvanên hollandî dor lê dipêça, lê ew Messi ye. Wisa pasek avêt, jîrekiya xwe carek din nîşan da. Û bi gola ku avêt jî, bû 10 gol bi vê formayê diavêje. Bi vê yekê gihîşt Batistuta. Lîstikvanê Arjantînê Batistuta di maçên Kûpaya Cîhanê de 10 gol avêtibû û lîstikvanê Arjantînê yê herî zêde gol avêtibû bû. Messi bi gola îro re gihîşt 10 golan û bû şirîkê rekora wî. Di maça nîv fînalê de Messi bikaribe golek din biavêje dê wî derbas bike.

Bi vê serketinê de Arjantîn bû reqîbê Hirvatistanê. Maça nîv fînalê ya di navbera van her du tîman de dê roja 13’ê mehê saet 22’yan de bê lîstin. Tîma bi ser bikeve dê here fînalê, tîma din dê maça sêyemînî bilîze.

*

Rûpela Taybet, hemû nûçe:

- Kûpaya Cîhanê 2022 Qatar, Rûpela Taybet    

Maça din a çarîk fînalê:

- Hirvatan nehişt Brezîlyayî bireqisin