Cemil Oguz

Di maça yekemîn a çarîk fînalê ya Kûpaya Cîhanê 2022 de Hirvatistan û Brezîlya hatin hemberî hev. 90 deqe û 120 deqe têr nekirin (1-1) û bi penaltiyan (3-1), bi qeleparêz Livakoviçê hirvatistanî Brezîlya şand mal û ew derbasî nîv fînalê bûn.

Maçeke bi heyecan li pêşiya hemû temaşevan, li benda hezkirên fûtbolê bû. Li aliyek Brezîlyaya favorî, li aliyê din Hirvatistana berxwedêr…

Neymarî avêt, Petkoviçi bersiv da

Di 90 deqîqeyên pêşî de ji bilî golê hemû heyecan hebû. Loma jî maç ber bi dema zêdek ve çû. Di nîveka yekemîn a dema zêdek de, ji Brezilyayê Neymar di deqîqeya 105+1 de gol avêt. Stad rabû ser piyan, hemû çepik ji bo Neymar bûn, bi dansê, bi reqsê, bi çaliman wî gol avêt. Qeleparêzê Hirvatistanê Dominik Livakovic ê heta vê kêliyê deriyê kelehê girtibû, gelek û gelek serketî bû, tiştek bikira tune bû. Serê hirvatan li pêş wan, kenê brezîliyan difûriya hewa...

Belkî gelek kes li bendê bûn maç bi vî awayî bi dawî bibe, lê reqîb hirvat bûn. Hirvatan dest ji berxwedanê, dest ji maçê, dest ji hêviyê bernedidan. Dema deqe hat 116’an vê carê dora gotinê ê wan bû: Bruno Petkoviçê ku gavek berê ketibû maçê rih da, can da tîma xwe û ew bir penaltiyan. Carek din hirvatan nîşan da ku berxwedan jiyan e.

Di penaltiyan de Hirvatistan bi tecrube bûn. Di maça berî vê de bi penaltiyan Japonya şandibûn mal û hatibû çarîk fînalê. Di wê maçê de qeleparêz Livakoviç di 3 penaltiyan de rê nedabû lîstikvanên japon û niha dîsa bar li ser milê wî.

Û erê, çawa Neymarî brezîlî rakiribûn ser piyan, çawa Petkoviçi bersiv dabû, vê carê dora qeleparêzan bû, ka dê wan çi bikira? Qeleparêz Becker nekarî tiştek bike, lê qeleparêzê hirvat Dominik Livakovic carek din mifte li deriyê keleha xwe da û Hirvatistan derket nîv fînalê. Livakoviç nehişt ji Brezîlyayê Rodrygo golê biavêje û dema Marquinhos jî gog li dîreka qeleyê da, êdî hêstirên Neymar, hêstirên brêzilyayiyan dihatin xwarê, her ku Hirvatistan e, kêfê wan li ber asîmanan bû. 

Notek li ser Neymar

Erê Brezîlyayê xatir xwest lê ji bo Neymar ê brezîlî heyecanek din bû: Bi golek dê biba şirîkê Pele. Û bû jî. Bi gola ku Neymar avêt bû 77 gol ku bi formaya tîma neteweyî diavêje. Heta niha di tîma Brezîlyayê de herî zêde Pele gol avêtibû, niha Neymar bû şirîkê wî.

Notek li ser Livakoviç

Qeleparêzê Hirvatistanê Livakoviç wisa qeleparêz e ku di vê kûpayê de di penaltiyan de rê li ber 4 golan girtibû. Bi vê ketiye nava dîroka dinyayê. Heta niha di kûpaya 2006’an de ji Portekîzê Ricardo, di sala 2018’an de ji Hirvatistanê Subasic nehiştibûn di tûrnûvayê de 4 penaltî veguherin golê. Û îsal ji Fasê Bounou, ji Hirvatistanê jî Livakoviçê nehiştin 4 penaltî bibin gol. Û bi vê Livakoviç bû lehengê Hirvatistanê û ji hemû temaşevanên fûtbolê jî çepik girtin…

Vê êvarê dê Hollanda û Arjantîn bi hev re bilîzin. Tîma bi ser bikeve dê bibe reqîbê Hirvatistanên.

Brezîlya bû 4 caran li heman cihî têk diçe

Brezîlyaya ku di her tûrnûvayê de bi gotina “Vê carê dê çêbe” dest pê dike, lê ev bû 4 tûrnûva di nav 8 tîman, yanê di çarîk fînalê de têk diçe. Brezîlya li hemberî tîmên ewropî serê wê li ber wê ye. Di sala 2006’an de li hemberî Fransa, di sala 2010’an de li hemberî Hollanda, di sala 2018’an de li hemberî Belçîkayê têk çû. Û îsal, Qatar 2022 de li hemberî Hirvatistanê têk çû. Di tûrnûvaya 2014’an de jî Brezîlya di nîv fînalê de li hemberî Almanyayê têkçûbû. Di wê maçê de Almanyayê 7 gol avêtibûn Brezîlyayê û brezîliyan tenê karîbû golek biavêjin.

***

Rûpela Taybet, hemû nûçe:

- Kûpaya Cîhanê 2022 Qatar, Rûpela Taybet