Diyarname

Di Kûpaya Cîhanê 2022’yan Koma H de Portekîz û Gana îro hatin hemberî hev. Ji maçê wêdetir rekora dinyayê ku Ronaldo bi vê maçê şikand bû rojeva dinyayê. Çima? Ji ber ku Ronaldo bû 5 caran beşdarî tûrnûvayên Kûpaya Cîhanê yên cuda dibe û di van her pêncan de jî golan diavêje. Bi vê yekê li dinyayê bû yekemîn lîstikvan ku di 5 tûrnûvayan de golan diavêje.

Cristiano Ronaldo di tûrnûvaya Kûpaya Cîhanê ya 2006, 2010, 2014, 2018 û 2022’yan de gol avêt û bi vê yekê ket nava dîrokê.

Ronaldo di maça îro de di deqîqeya 65’an de ji penaltiyê gol avêt û tîma xwe 1-0 derxist pêş. Di deqîqeya 73’yan de Andre Ayew li ser navê Ganayê bersiv da. Di deqîqeya 78’an de  Portekîz vê carê bi Joao Feliks derket pêş, di deqîqeya 80’ê de Rafael Leao encam anî 3-1”ê. Ji Ganayê osman Bukarî 89’an de bersiv da lê vê yekê têra wan nekir.

Brezîlyayê 2 gol avêtin

Di maça yek ji favoriyan de Brezîlyayê Sirbistan kir mêvan. Di maça Koma G de Sirbistanê xweş ber xwe da, nîveka yekemîn bi 0-0’ê bi dawî bû lê sirban nekarî di nîveka duyemîn de jî bi têra xwe ber xwe bide. Loma di deqîqeya 62’yan de Richarlison Brezîlya derxist pêş û di deqîqeya 73’yan de heman lîstikvanî encam diyar kir. 

Maçên din

Îro du maçên din jî hebûn. Di maça Koma G de Swîsreyê Kamerûn bi 1-0 têk bir. Di maça Koma H de Ûrûgûay û Koreya Başûr hatin ba hev û maç bi 0-0’ê bi dawî bû.

"""

Ji bo agahiyên li ser Kûpaya Cîhanê:

- Kûpaya Cîhanê 2022 Qatar, Rûpela Taybet