Diyarname
Ji bo 9’emîn Pêşbaziya HElbestê ya Arjen Arî dema serîlêdanê dest pê kir. Yên bixwazin dikarin heta 1’ê adara 2022’yan dosyayên xwe bişînin ber destên amadekaran.
Ji bo bîranîna helbestvan Arjen Arî, ji bo xwedîlêderketina ziman û wêjeya kurdî Malbata Arjen Arî û Weşanên Sor bi hev re vê pêşbaziyê li dar dixin. Niha 9’emin car dê li dar bikeve û dema serîlêdanên destê pê kir. Îsal lijneya juriyê ji Îrfan Amîda, Necla Arî, Hamid Omerî. Hatice Kiliç û Rêdûr Dîjle pêk tê. Dosyaya ku bi ser bikeve roja 15’ê gulana 2022’yan dê bê eşkere kirin.
Li gor daxuyaniya ku hate belavkirin ev şertên pêşbaziyê bi vî rengî ne:
- Xelat dê bo berhemên bi zaravayê kurmancî hatî nivîsandin bê dayîn.
- Wekî xelata pêşbirkê berhema ku bi ser bikeve dê ji hêla saziya ku vê pêşbirkê li dar dixe ve, ji hêla Weşanên Sor ve bê çapkirin.
- Her kesê ku heta niha berhemeke wî/wê ya helbestê nehatibe çapkirin dikare serî lê bide.
- Malbata Arjen Arî û Weşanên Sor dê bi hev re kesekî/ê ku ji bo parastin û pêşvebirina ziman û edebiyata kurdî kar û xebat kiriye hilbijêrin û “xelata giramgiriyê/xelata rûmetê” bidinê.
- Berhemên ji hêla saziyek ve hatibe xelatkirin an di pêşbirkekê de xelat wergirtibe nikare tevlî pêşbirkê bibe.
- Berhemên ku tevli pêşbirkê bibin divê bi alfabeya latînî hatibin nivîsandin.
- Mafê lijneyê heye ku di dema çapkirinê de li ser berhema ku xelat wergirtiye guhertinan bike.
- Heke jurî ti dosyeyê hêjayî xelatê nebîne dikare xelat nede.
- Dosyeyên ku ji bo pêşbirkê bêne rêkirin divê di qabareya(hacm) pirtûkê de, 64 rûpel (4 form) bin.
- Dosye divê di formata A4 de, 5(pênc)nusxe û bi USByek ku dosye tê de ye bê rêkirin.
- Dosyeyên ku bi kompûterê nehatî dîzaynkirin û USByek pêve nekirî wê neyên nirxandin.
- Divê di dosyeyê de nav, nîşan an mexlas hwd. ku xwediyê berhemê bide nasîn tunebe.
- Helbestvanên ku beşdarî pêşbirkê bibin dê kurtejiyan, navnîşan û pêdiviyên bo têkiliyê di nav zerfeke devgirtî de rêbikin.
- Encama pêşbirkê dê di 15ê Gulana 2022an de, yanê roja cejna zimanê kurdî bê aşkerekirin.
- Divê dosye bi kargo yan bi posteyê, bo vê adresê bêne rêkirin:
Pêşbirka helbestê ya Arjen Arî
Yenişehir Mahallesi, Ali Emiri 5. Sokak, Ademoğlu Apt, No:8, Daire:7, Yenişehir/Diyarbakır
(li ser navê Buroya Amedê ya Rojnameya Evrenselê)
- Serlêdanên rû bi rû nayên qebûlkirin.
- Dosyeyên ku bo pêşbirkê bêne rêkirin li xwediyê wan nayêne vegerandin.
- Endamên lijneya pêşbirka helbestê ya Arjen Arî, dê piştî encamê bizanin ka xwediyê berhemên ku dengê xwe dane wan kî ne.
- Kesên xwedî berheman divê di navbera heya 1ê Adara 2022an dosyeyên xwe bişînin.
- Pêwendî; Reşo Ronahî: 0543 488 6996