Diyarname

Nivîskar û mebûsê HDP'ê yê berê Prof. Dr. Kadri Yildirim îro li Amedê mir. Yildirim ev 4 roj bûn li nexweşxaneyê bû.

Prof. Dr. Kadri Yildirim di sala 1959'an de li Liceyê Amedê hatiye dinê. Dibistana seretayî û navîn li Amedê xwendiye. Yildirim piştî xwendina Siirt Egîtîm Yuksekokulu derbasî Zanîngeha Îlahîyatê ya Herranê bûye. Wî, li wê derê lîsansa bilind û doktoraya xwe temam kiriye. Yildirim 13 salan mamostetî kiriye. Yildirim di sala 1999'an de li Fakulteya Îlahîyatê ya Zanîngeha Dîcle bûye cîgir doçent, 2004'an de bûye doçent, 2010'an de bûye proferos. 

Dema li Zanîngeha Artuklû ya Mêrdînê Beşa Kurdolojiyê vebû ew bû midûrê wir.

Yildirim li Zanîngeha Artûklû bû cîgirê rektor. Piştî rektorî di sala 2015'an de li ser navê HDP'ê ji Sêrtê ji bo mebûsî hat hilbijartin.

Prof. Dr. Yildirim di meha berfanbara par de bi vîrusa koronayê ketibû lê baş bûbû. 4 roj xwîn çû ser rehên mejiyê wî û ew rakirin Nexweşxaneya Gazi Yaşargil a li Amedê lê nekarî rizgar bikin. Yildirimê ku îro wefat kir bavê çar zarokan bû. Yildirim ligel kurdî, bi tirkî, erebî, farisî û îngilîzî dizanî.

Prof. Dr. Kadri Yildirimê ku ji aliyê her kesî ve dihat hezkirin, di hemû jiyana xwe de nêzî 20 pirtûk nivîsandibûn û pêşkêşî pirtûkxaneya kurdî kiribûn.  Bi taybetî di warê klasîkan xwedî gotin bû ku li ser Baba Tahir, li ser Mem û Zînê, Nûbihara Biçûkan, Aqîdeya Îmanê, Medreseyên Kurdan pirtûkên wî hebûn.