Diyarname

Nivîskar Omer Dilsoz piştî sê salan romaneke din pêşkêşî xwendevanên kurdî kir: "4 Kotra 4Çela".

Nivîskarê Diyarnameyê Omer Dilsoz heta niha 7 roman, yek helbest û yek jî pirtûka fablan bi t emamî 7 pirtûk nivisandibûn û ew hatibûn weşandin, niha romaneke nû li wan zêde kir. Romana bi navê “4kotra 4çela” ji Weşanên Lîsê derket. Romaka ku vê mehê gihîşt ber destê xwendevanan ji 270 rûpelan pêk tê. 

Di romana xwe de Dilsoz, ketiye dû raza tilîkên qipiyayî û di kuçe û kolanên hişê lehengê romanê de li bêhna azadiya mirovîn digere. 

Zimanê romanê rewan û heta bêje sade ye. Çend tebeqe; hiş û derhiş, raborî û îro di nav hev de lê bêyî ku li hev aloz bibe, bi şarezayî gav bi gav, bi rîtma meşa pêlavekê tê vegêran. 

BEŞEK JI ROMANÊ

Beşek ji romanê bi vî rengî ye: “Wîzînî bi ambûlansan ket. Hawar bi bajêr. Vê carê li nêzî nexweşxaneyê, hema çendekî dûrî me, gurmînîyeke qewî xedar erd û ezman bi ser ser û guhên me de anîn xwarê. Camên jûrên nexweşxaneyê bi erdê re bûn yek. 

Wê demê di naxê min de li cihekî guleke bişkok ji takê xwe qetîya û bi ser rondikên min de şiqitî. Hawar û sed hawar! Dalanên nexweşxaneyê meydana heşrê ye, dê weledê xwe diavêje. Bav weledê xwe… Bav. Anîn. Li ser çardarê. Ew kurik. Anîn ba min. Ewil çavê min pê ket. Oyyyy li min, oyy bavoo!.. Oyy tilîka min diêşe! Bibêjine bavê min, bila bê. Bila bê û maçî bike. Gava bavê min maçî bike “uvve” namîne. Xeşşşş dibe, tilîka min xeşş dibe… Oyyyy! Oyy bûvve bûye, bûvvve! Bavo bûvvve bûye!”

OMER DILSOZ KÎ YE?

Nivîskar Omer Dilsoz di sala 1978'an de li Colemêrgê gundê Gûzereşê hatiye dinê. Li Gûzereşê fêrî xwendin û nivîsînê bûye û dinyaya sêhrewî ya nivîsê deriyê xwe lê vekiriye. Dilsoz di salên xwendinê de li Colemêrgê dest bi nivîsîna kurdî kirîye û gelek nivîs û ceribînên wî di rojname û kovarên kurdî de hatine weşandin. Ew li Amedê kar û barên xwe yên nivîsînê didomîne û di heman demê de di Diyarnameyê de qunciknivîskari dike.

Pirtûkên wî:

- Hêviyên Birîndar / Weşanên Aram / Roman / 2003

- Bêhna Axê / Weşanên Berçem / Roman / 2005

- Bila Gotineke Min û Te Hebe / Weşanên Berçem / Helbest / 2007

- Neynika Dilî / Weşanên Aram / Roman / 2009

- Berbiska Zer / Weşanên Avesta / Roman / 2011

- Hevrazên Çiyan / Weşanên J&J / Roman / 2013

- Ez û Min / Weşanên J&J / Roman / 2015

- Kundê Dadger / WeşanênHîva / Fabl / 2016

- Gêjevang / Weşanên Lîs / Roman / 2018

- 4kotra 4çela / Weşanên Lîs / Roman / 2021

- 4 Kotra 4Çela / Omer Dilsoz / Weşanên Lîs / 270 Rûpel / 2021 / Roman

"4kotra 4çela" 8'emîn romana Omer Dilsoz e ku derketiye.