Diyarname
Ji bo Roja Zimanê Kurdî li Amed, Wan û Îzmîrê daxuyaniyên çapemenî hatin dayîn û ev roj hat pîrozkirin.

Li Amedê Kurdî Derê li ber Mêvanxaneya Şaredariya Bajarê Mezin daxuyaniyeke pêşkêş kir. Di daxuyaniya çapemeniyê de Serokê DTP'a Amedê Nejdet Atalay, Şaredarê Kayapinarê Zulkuf Karatekin, Serokê Komeleya Nivîskaran Îrfan Babaoglu, endamên Însiyatîfa Dayikên Aştiyê, Endamên Komeleya Hemwelatiyên Azad û bi sedan kes amade bûn.
Di daxuyaniyê de diruşma " "Zimanê me rûmeta me ye"  hatin avêtin. Serokê Giştî yê Kurdî-Derê li ser asîmîlasyona li ser kurdî sekinî, got ku zimanê me rûmeta me ye û divê em xwedî lê derkevin. Aktaş wisa got: "Her kesê ku ji Tirkiyeyê hez dike, diwaze li vî welatî aştî, biratî û hizûr çêbe divê ji bo belatkirina qedexeya li ser kurdî xebatê bike. Ji ber ku mafê gelê kurd û zarokên wan jî heye ku bi zimanê dayika xwe perwerdehiyê bibînin."

Li Wanê jî Şaxa TZPKurdî bi beşdariya saziyên wekî DTP, Goç-Der, TUAD-DER, Navenda Çanda Serhedê, KESK, Egitim Sen, YODER, endamên Meclisa Şaredariya Wanê yên DTP'yî, Tevgera Hemwelatiyên Azad, Tevgera Jinan, ÎHD daxuyaniyeke çapemeniyê pêşkêş kir.
Berdevkê demê yê TZPKurdî Qahir Bateyî xwest ku kurdî bikevi bin ewlehiya Zagona Bingehîn, pê perwerdehî bê dayîn, bang li her kurdî kir ku li hemberî asîmîlasyon û otoasîmîlasyonê bisekinin û kurdî bikin zimanê jiyana rojane.

Li Îzmîrê jî Kurdî-Dera Îzmîrê li ber Sumerbanka Kevn a li Konakê daxuyaniyeke pêşkêş kir. Saziyên wekî DTP, EMEP, SDP, ESP, ÎHD, Goç-Der, TAYD-DER, Azadiya Welat piştgirî da daxuyaniyê.