Diyarname
Li Danîmarkayê di vê 15’ê mehê de dê doza Roj TV dest pê bike. Hemû mebûs û şaredarên BDP’ê metneke îmzayê amade kirin, bi vê metnê piştgiriya xwe ya ji bo Roj TV diyar kirin û xwestin her kes bi îmzeya xwe piştgirî bidin televîzyonê.

Di metna ku hate amadekirin de wiha hate gotin: Roj TV ji ber ku dengê civaka kurd û muxalîfan e bûye hedef û ev doza ku hatiye vekirin jî li dijî azadiya çapemeniyê, azadiya zimanê gelan û mafên mirovan e.

Ev metin dê ji bo hemû saziyên navneteyewî û saziyên Ewropayê bê şandin. Her wiha di metnê de wisa hatiye gotin: “Wekî ku tê zanîn Roj TV ku lîsansa weşanê ji Danîmarkayê girtiye, ji belgeyên Wikileaksê jî tê fêmkirin ku bi awayeke nehiqûqî dozgerên Danîmarkayê der barê wî de doza girtinê vekirine. Dema ku mirov pîvanên çapemeniyê yên gerdûnî dibîne, Roj TV ji çapemeniya dewlet û kartelê cuda ye û bi aweyeke serbixwe dengên gelen bêsansur digihîne her derê û bi perspektîfeke rexneyî xebatên xwe didomîne.”

Wisa dawî li metnê anîne: “Em wekî civaka kurd û hêzên demokrasiyê yên li Tirkiyeyê, ji Danîmarka û welatên Ewropayê ku azadiya çapemeniyê û parastina mafên mirovan ji xwe re kirine bingeh daxwaza me ev e ku ne Roj TV bigire, berevajî vê yekê bingehek saz bikin ku Roj TV li ser axa xwe weşanê bike. Di vê çarçoveyê de em bang li hemû rewşenbîr, hilbijêr û kesên qîmetê didin demokrasî û mafên zimanê zikmakî, li hemberî ev doza Roj TV ku nayê qebûlkirin derkevin, xwe wekî alîgirê azadiya çapemeniyê bibînin û îmzeya xwe bavêjin bin ev metna piştgiriyê.”