Diyarname

Piştî ku rêveberiya zanîngehê karê mamosteyê beşa kurdî ya Înalcoyê Îbrahîm Seydo Aydogan da sekinandin, îro du enstîtuyên kurdî bi nameyeke daxuyaniyeke piştgirî dan Aydogan.

Komek xwendekarên kurd li hemberî mamosteyê wan Îbrahîm Seydo Aydogan serî li rêveberiya zanîngehê dabûn. Li ser vê rêveberiya zanîngehê karê wî dabû rawestandin û ketina wî ya zanîngehê jî qedexe kiribû. Aydogan di vî warî de serî li hiqûqê dabû. Niha jî daxuyaniyeke piştgiriyê ji bo Aydogan hat belavkirin.

Hevserokê Enstîtuya Kurdî ji bo Lêkolîn û Zanistî ya li Almanyayê Fevzî Ozmen û Serokê Enstîtuya Kurdî ya Brukselê Derwich M. Fermo daxuyaniyeke hevbeş belav kirin û piştgiriya xwe bo Aydogan.

Bêyî em dest bidin daxuyaniyê em diweşînin:

***

Ji raya giştî re,

Em ji ser tora civakî û ji malperên kurdî û fransî jê agahdar bûn ku li dijî Profesorê Alîkar Dr. Îbrahîm Seydo AYDOGAN, mamoste û serokê beşê kurdî yê Zanîngeha ÎNALCO’yê ku bi navê Sorbon jî tê naskirin, tevgerek hatiye lidarxistin û dixwazin bi awayekî ne hiqûqî îtibara wî û rûmeta wî bişkînin.

Em weke sazî û dezgehên kurd yên çandî, civakî û rewşenbîrî, dixwazin bînin bîra herkesî ku birêz Îbrahîm Seydo AYDOGAN ji salên 90î ve ye ku di nava civaka Kurdî û qada Lêkolînên Ziman û Wêjeya Kurdî de fîgurekî naskirî ye. Xebat û Lêkolînên wî di nava Kurdolojiyê de referansên gellekî girîng in û bi kesayetî û dilsoziya xwe ya kurdî ve ji aliyê herkesî ve tê hezkirin û bûye nirxekî gelê kurd.

Di rewşên herî xirab de Îbrahîm Seydo AYDOGAN ked daye gîhandin û perwerdekirina gelek wergêr û lêkolîner û mamosteyên kurdî. Tenê îsal bi projeya Zanîngeha Kurdî ya Online ve ku çar mehan dewam kir, teva 16 Profesorên navdar ku wî civandibûn, bi xwebexşî perwerdehî da derdora 500 kesan û ji vana nêzî 200 kes mamosteyên Rojavayê bûn ku îroj di qada zimanê kurdî de perwerdehiyê didin. Mamoste Seydo herweha bi bernameyeke fermî ya Zanîngeha INALCO’yê perwerdehî da mamosteyên Kurdî yên ku dê li dibistanên Almanyayê perwerdehiya kurdî bidin. Di ber re, li Belçîka û Hollandayê perwerdehî da wergêrên kurdî da ku bi awayekî profesyonelî bikarin vî karê girîng bikin. Hemû aktorên qada perwerdehî û rewşenbîriya kurdî baş dizanin ku keda wî di van 25 salên dawîn de daye, alîkariya gellek kesan kiriye û bi keda wî ve perwerdehiya ziman û wêjeya kurdî di qada zanistî de bi pêş ketiye û prestîja qada kurdnasiyê bilind bûye. Mamoste Seydo kesekî ewqasî engajeyî ziman û wêje û çanda kurdî ye ku bandora wî bi awayekî aşkere li ser nifşên nû heye. Engajman û dilsoziya wî ya ji bo xwendekaran ji aliyê herkesî ve tê zanîn û kesayetiya wî û rûmeta wî û şiyana wî ya rewşenbîrî û zanistî nikare were nîqaşkirin.

Li gorî agahiyên ku li ser tora civakî digerrin, dibêjin ku wî gef li hin xwendekaran xwariye û heqaret li wan kiriye; lê hin xwendekarên din jî dibêjin ku ev derew û bêbextî ne, lê digel vê jî birêvebiriya Zanîngeha ÎNALCO’yê beyî ku îfadeya Mamoste Seydo bigire û beyî ku guh bide xwendekarên din, ji dêleva ku li gorî qanûn û usûlan rastiyê derxe holê, biryara rawestandina karên Mamoste Seydo daye. Rêvebiriya Zanîngehê bi vê ve nesekiniye, herweha wêneyê Mamoste Seydo teşhîr kiriye û bi awayekî fermî qedexe daniye ser wî da ku nikaribe bikeve nava avahiyên zanîngehê. Ev agahî û biryara fermî ku serokê zanîngehê îmze kiriye, ev demeke li ser tora civakî û li nav medyaya kurdî digerrin. Ev rewş ji bo mamosteyekî û kesayetiyeke mîna Mamoste Seydo heqaret û neheqiyeke mezin e û nikare were qebûlkirin. Dixwazin wî bi tenê bihêlin, li ber çavên derdorê reş bikin, pûç bikin da ku bi rûmeta wî bilîzin. Bila herkes bizane ku Mamoste Îbrahîm Seydo AYDOGAN ji bo milletê kurd û ji bo nivîskar û lêkolîner û rewşebîrên kurd semboleke mezin e û em di wê baweriyê de ne ku di şexsê wî de ev êrîş li dijî hemû gelê kurd e. Bila herkes bizane ku Mamoste Îbrahîm Seydo AYDOGAN yê ku ewqasî ked daye ziman û wêje û rewşenbîriya kurdî, ne bi tenê ye û ne bêxwedî ye û em ê wî bi tenê nehêlin. Di vê rewşa xirab de ku dixwazin bînin serê wî, qesda ked û rûmeta wî dikin.Em xema wî dixwin û gumana me li ser jiyana wî heye.

Em bangê li Hikumeta Fransayê dikin ku zû bi zû bi vê meseleyê ve dakeve, di çarçeweya “Em bangê li Rêveberiya Zanîngeha ÎNALCO’yê dikin ku nekeve feqa xelet, zû bi zû ji vê biryara xelet vegere, dev ji pûçkirin û reşkirina rûmeta mamosteyekî kurd berde. Lêborînek însanî were xwestin û hemû berpirsê van bêbextiyan aşkere bike.”

Em dubare dikin: Îbrahîm Seydo Aydogan temsîla me hemûyan dike. Em vê êrîşê li ser xwe dihesibînin û em ê wî bi tenê nehêlin. Bila herkes bizane ku Îbrahîm Seydo AYDOGAN ne bêxwedî ye û ne bi tenê ye.

Hevserokê Enstîtuya Kurdî ji bo Lêkolîn û Zanistî ya li Almanyayê Fevzî Ozmen

Serokê Enstîtuya Kurdî ya Brukselê Derwich M. Fermo

***

- Nûçeya Eleqedar:

- Li beşa kurdî ya ÎNALCO’yê çi diqewime?