Amed
Komeleya Pêşvebirin û Lêkolînkirina Zimanê Kurdî (KURDÎ-DER) heta niha gelek şax vekiriye û xebata xwe dike, niha jî li navçeya Çinara Amedê şaxa xwe vekir.
Di merasima vekirna komeleyê de Serokê Giştî yê KURDÎ-DER'ê Burhan Zorooglu, Serokê BDP'a Amedê Mehmet Alî Aydin, Serokê BDP'a Çinarê A. Kadîr Dogan, Cîgirê Şaredarê Çinarê Ramazan Dengîz, nûnerên MEYADER'ê, saziyên sivîl ên civakî û gelek kesên ji gel amade bûn.
Serokê Giştî yê KURDÎ-DER'ê Burhan Zorooglu li vir axaftineke kir û got ku zimanê biyanê ji bo mirovan wekî cil e lê zimanê dayikê bedena mirovan bi xwe ye û ev yek lê zêde kir: "Mirov dikare cilên xwe her tim biguherîne lê beden nayê guhertin. Zimanê me heta niha bi zor û zehmetiyan hatiye parastin. Zimanê me bi asîmîlasyonê re rû bi rû ye. Her çiqas wekî serbest nîşan bidin jî bi polîtîkayeke dirû re rû bi rû ye. Hêj beriya çend rojan ji ber ku Şaredariya Bismîl û Sûrê bi pirzimanî xizmet da der barê wan de doz hatin vekirin. Heke zimanek nebe zimanê perwerdehiyê ew ê tune bibe. Divê em xwedî li ziman û komeleya xwe derkevin."
Piştî axaftinan şaxa komeleyê hate vekirin û Serokê KURDÎ-DER'ê yê Çinarê Huseyîn Ertekîn dersa yekem da.