Diyarname
Weşanên Yordamê pirtûkên bingehîn ên Komunîzmê bi kurdî derxistin. Manîfestoya Komunîst û rêzeromana Kapîtalê, "Kapîtal Manga" bi kurdî derket.

Li ser rûyê dinyayê hin pirtûk hene li hemû zimanan nebe jî li gelek zimanan hatine wergerandin. Hin ji wan pirtûkan Qurana Misilmaman e, Încîla Xiristiyanan e. Yek ji pirtûkên bi vî rengî jî Manîfestoya Komunîzmê ye. Manîfestoya Komunîzmê jî heta niha li dehan ziman hatiye wergerandin û ev manîfesto niha ji bo kurdî hate wergerandin û ji Weşanên Yordamê derket.

Manîfestoya Komunîst yekemîn berhema herî berbelav a sosyalîzma zanistî ye.  Di vê berhemê de ramana sosyalîst bi awayekî kurt û puxteyî, bi zimanekî rewan û wêjeyî hatiye pêşkêşkirin.

Manîfestoya Komunîst ji aliyê danerên ramana markîzmê Karl Marks û Friedrich Engles ve di sala 1848’an de hatibû nivîsandin.

Manîfestoya ku heta niha li gelek zimanan hatibû wergerandin niha li ser daxwaza Weşanên Yordamê zimanzan Samî Tan ew wergerand kurdî û wekî pirtûk derket.

Di manîfestoyê de gotineke navdar heye, bi gotina din paşgotina navdar. Ev paşgotin li nav her gelên ku li ser bîrdoziya Komunîzmê ne li ser zimanan e. Ev paşgotin bi vî awayî, bi vî şiklî li kurdî hatiye wergerandin û di pirtûk de cih girtiye: “Komunîst veşartina raman û dilxwaziyên xwe red dikin. Ew diyar dikin ku bi tenê dikarin bi riya ji binî ve hilweşandina teveka pergala civakî ya heyî bigihêjin armanca xwe. Bila qe çînên serdest bi tirs û sawa şoreşeke komunîst bilerizin. Ji bilî zincîrên xwe tiştekî ku proleter ji dest bidin nîn e. Lê cîhaneke ku bi dest bixin heye.
Karkerên hemû welatan, bibin yek!”

Xêzeromana Kapîtalê

Pirtûka duyemîn a ku Yordam Kîtapê li kelepora kurdî zêde kiriye jî xêzeromana  berhema bingehîn a Karl Marks Kapîtal Manga ye.  Kapîtal Manga cara pêşîn di sala 2008’an de li Japonyayê hatiye weşandin, piştre di sala 2009’an de ji hêla Yordam Kîtapê ve li tirkî hatiye wergerandin.  Her wekî li Japonyayê li Tirkiyeyê jî pirtûkê gelekî bal kişandiye ser xwe. Di vê pirtûkê de puxteya Kapîtalê û têgihên bingehîn bi alîkariya çîrokeke ku pêvajoya hilberandinê ya li palûkeya penêr vedibêje, tên pêşkêşkirin. Ji ber ziman û şêwaza xwe, wisa dixuye ku dê ev pirtûk bi kurdî jî balê bikişîne.

Di Kapîtal Mangayê de rê û rêbazên kedxwariyê û domana hilberîna kapîtalîst bi zimanekî çîrokî, bi diyalogên balkêş û bi hêza xêzan tên pêşkêşkirin. Ji ber van taybetiyên xwe ev pirtûk dê hem bala kesên ku bi kurdî dizanin, hem jî kesên ku dixwazin hînî kurdî bibin an jî kurdiya xwe bi pêş bixin were.

Ev xêzeroman jî ji aliyê Samî Tan ve ji bo kurdî hatiye wergerandin.

Yordam Kîtap jî wekî gelek weşanxaneyên din beşdarî Fûara Pirtûkan a Amedê dibe. Yordamk di heman demê de ji bo danasîna van her du pirtûkan li TUYAP’ê çalakiyeke li dar dixe. Çalakî roja 20'ê mehê wê bi beşdariya Tarik Ziya Ekîncî, Şeymus Dîken û Samî Tan li dar bikeve.

- Manîfestoya Komunîst/ Karl Marks - Friedrich Engels / Werger: Samî  Tan / 61 rûpel

- Kapîtal Manga / Berhema Resen: Karl Marks / Mangaker: Variety Art Works - East Press/  Werger: Samî Tan/ 192 rupel