Diyarname
Bi beşdariya 2 hezar kesî li Nisêbînê Navenda Çanda Mîtanî vebû. Li Nisêbînê 3 roj çalakiyên çandî hene.

Şaredarê Nisêbînê Dr. Mehmet Tanhan, Hevseroka DTP'ê Emine Ayna, Serokê Koma Meclisê ya DTP'ê Ahmet Turk, mebûsên DTP'ê yên din Aysel Tugluk, Akin Birdal, mebûsê DEP'ê yê berê Selim Sadak, Metropolita Mêrdîn-Amedê Saliba Ozmen, nivîskar Baskin Oran, Ferhat Tunç û li dor du hezar kesî di vekirina Navenda Çanda Mîtanî de amade bûn.

Navenda Çanda Mîtanî ji aliyê Şaredariya Nisêbînê ve hate avakirin. Şaredarê Nisêbînê Tanhan di vekirina navenda çandê de got ku ji Nisêbînê kesên wekî Mor Yakup, Mor Efrem û Musa Anter derketine û navenda çandê jî dê layiqê wan be.

Serokê Koma Meclisê yê DTP'ê Turk jî da zanîn ku li vî welatî pirsgirêka sereke pirsgirêka kurd e û wiha berdewam kir: "Ev polîtîka polîtîkayên 30 salan in. Ev polîtîka heta niha bi kêrî tiştekî nehatin. Tu ferqa Ak Partî û partiyên din nema. Ji ber ku wê jî gelê me xapand. Koma ku Komarê bi rê ve dibe li vî welatî biratî naxwaze."

Di vê navberê de heta 4'ê mehê dê dê bi navê Merheba Apê Mûsa hin çalakî bêne li dar xistin. Di van çalakiyan de dê Yekbûn, Hozan Faqîn (Koma Azad), Ferhat Tunç, Kulîlkên Amara, Sîmar, Zinar Sozdar, Mehmet Atli, Hozan Caçan, Bahremo, Armanc, Xêro Abbas bi stranên xwe, Akin Bîrdal, Prof. Dr. Mithat Sancar, Parêzer Ebru Gunay, Ozturk Tukdogan, Doç. Dr. Turkan Sancar, Doç. Dr. Kadriye Bakirci, Parêzer Ayla Ata Akat, Feleknas Uca, Yavuz Onen, Baskin Oran, Cengiz Gulez, Abdullah Demirbaş li Nisêbînê amade bin û beşdarî hin çalikiyan bibin.
Her wiha di 4'ê mehê saet 17'an de bi beşdariya helbestvanên kurd Fatma Savci, Arjen Arî, Jana Seyda, Ehmed Huseynî çalakiyeke helbestxwendin û sohbeta li ser helbestê li dar bikeve.