Diyarname

Îsal 7’emîn car Pêşbaziya Helbestan a Arjen Arî ji aliyê Weşanên Sor û Malbata Arî ve hat lidar xistin hat eşkere kirin. Di pêşbaziyê de Suat Baran bi dosyaya xwe ya bi navê “Kitêba Elbakof” bi ser ketiye. Dosya di dema pêşiya me de wê wekî pirtûk ji Weşanên Sor derkeve.

Ji ber vîrusa koronayê amadekarên pêşbaziyê bi awayekî nivîskî encama pêşbaziyê eşkere kir. Pêşbaziya îsal ku serîlêdanên wê sermawej/mijdara 2019’an de hatibû des pê kirin, 5 dosya ji bo wan hatibûn şandin. Ji van wan dosyaya Baran bi ser ket. Di daxuyaniya ku hate eşkere kirin de wisa hat gotin: “Îro Cejna Zimanê Kurdî ye. Em li ser navê pêşbirkê û Weşanên Sor pîroz dikin û hêvî dikin ku ev pêşbirk hê gelek ciwanên qelemxurt bigihîne edebiyata kurdî û bi qelemên wan û gelek ciwanên dî edebiyata kurdî her bi pêş ve biçe. Îsal 5 dosyeyan serî li pêşbirkê dan. Juriya îsalîn ji Fewzî Bîlge, Yeqîn h., Bêrîvan Zînzal, Berken Bereh û Necla Arî pêk dihat. Pênc endamên juriyê dosyan nirxandin û nîqaşên xwe kirin. Bi qineta hevpar a her pênc endamên juriyê, bi boneya ku xwediyê dosyeyê edebiyata kurdî û ya cîhanê baş dizane û hêviya pêşketinê dide, dosyaya Suat Baran a bi navê Kitêba Elbakof hêjayî xelatê hatiye dîtin.” 

Amadekarên Pêşbaziyê ji bilî xelata helbestê di heman demê de xelata rûmetê jî dide. Îsal wan Prof. Dr. Şebnem Korur Fincancı hêjayî xelata rûmetê dîtine û li ser vê jî wisa gotine: “Fincanci salên dûdirêj in ku wekî seroka giştî ya Weqfa Mafên Mirovan a Tirkiyeyê li hemberî îşkence û zordestiya hêzên dewletê xebatên zanistî dimeşîne, bi tedawî û kordînasyona kesên îşkencedîtî ve mijûl dibe, her parastina mafên gelê kurd dike û ji bo dostaniya gelên Rojhilata Navîn û dinyayê têdikoşe.”

Merasima xelatdayîna pêşbaziyê her li Fûara Pirtûkan a Amedê de dihat dayîn lê ji ber îsal nediyar e dê fûar li dar bikeve yan na di rojên pêş de dê diyar bikin ku ka kengê û li ku vê mesarimê li dar bixin.

Di dawiya daxuyaniyê de amadekiran bang kiriye ku ji bo sala pêşiya me ji niha ve dosyayên xwe amade bikin û ji bo pêşbaziyê bişînin.

Suat Baran kî ye?

Suat Baran di sala 1986’an de li Wanê hate dinyayê û zaroktî û balixiya xwe li Trabzonê derbas kiriye. Li Zanîngeha Stenbolê Ziman û Wêjeya Yûnaniya Nûjen (2008) û li Zanîngeha Yildiz Teknikê Mamostetiya Îngilîzî (2015) kuta kir, dûre li Zanîngeha Bilgiyê di beşa Cultural Studies de mastera xwe wergirt (2014) û niha jî li Zanîngeha Boğaziçiyê di beşa Edebiyata Tirkî de doktoraya xwe dike. Di teza xwe ya masterê de li ser trawmaya zimên û bêdengiyê xebitî di roman û çîrokên Suzan Samanciyê de.

Ev deh sal zêdetir e bi karê wergera edebî re jî mijûldar e hem ji yewnanî hem jî îngilîzî. Ji yewnanî bo tirkî 5 wergerên wî wekî kitêb çap bûne di navbera 2007-2010’an de. Lê dûre dev ji wergera tirkî berda û bala xwe bêtir da kurdî. Heta niha gelek wergerên wî yên bi kurdî yên gotar, çîrok û helbestan di kovarên mîna Yazinca, Tabularasa, Wêje û Rexne, Zarema, Jehr, Asîva, Derwaze û bloga wî (wergeraedebi.blogspot.com) de derketine. Di ekîba derxistina kovara nîv-akademîk ya Zaremayê de rolek girtiye. Ew ji dema lîseyê ve helbestan dinivîse û ev têkiliya xwe qet qut nekiriye.