Diyarname
Kovara analîz û şîroveyên siyasî, civakî û çandî Le Monde diplomatique kurdî, hejmara xwe ya nû derxist.

Di vê hejmarê de, gotareke lêkolîner û nivîskarê kurd M. Malmisanij a bi sernivîsa "Riya ku ji antîkurdolojiyê ber bi kurdolojiyê ve diçe û Îsmaîl Beşîkçî" cîh digre. Malmisanij, di vê nivîsa xwe ya dirêj de radixîne ber çavan ku çawa dîroka kurdan ji aliyê dewlet û "zanyarên" tirk ve hatiye tehrîfkirin û li ser vê meselê navê gelek kes û bûyerên bi vî rengî tîne ziman. Malmisanij, her wiha balê dikşîne ser rola Îsmaîl Beşîkçî xebat û lêkolînên wî yên zanistî.

Nivîsek din a redaksiyona kurdî jî ya Prof. Dr. Ferhad Îbrahîm e. Di nivîsa ku bi senivîsa "Krîza Siyasî ya li Iraqê û rola Kurdan" hatiye nivisandin de Îbrahîm balê dikşîne ser rola kurdan ya tayînker a li Iraqê. Nivîskar, di gotara xwe de nirxandinê li ser daxwaz û pirsgêrêkên kurdan ku bi aliyên siyasî yên Iraqî re dijî dike.

Wekî hejmarên xwe yên berê, Le Monde diplomatique kurdî, vê care jî cîh daye nivîseke ji "Arşîva bîra Kurdan". Ev nivîs, di nîsana 1977'an de ji aliyê Philippe Rondot ve û bi sernivîsa, "Herêma otonom a Kurdistanê û meşa dirêj ya ber bi otonomiyê ve" hatiye nivîsandin.

Di rûpela Kultur Polîtîk de Kejo Bajar, kurdîya ku di fîlmê "Min Dît" yê derhêner Miraz Bêzar de hatiye bikaranîn dinirxîne. Bajar, li vê derê bi mînakan dide nîşandin ku ka gelo zimanê kurdî di fîlm de çawa şaş hatiye bikaranîn.
Di heman nivîsê de, pirtûka "Sîsirkê Hesinî" ya Selîm Berekat, ku ji aliyê weşanxaneya APEC’ê ve hatiye çapkirin tê nasandin. Kejo Bajar, her wiha pirtûkeke din a bi navê "Ronahî" ku ji aliyê Weşanên Belkî ve hatiye çapkirin jî dide nasandin. Pirtûk, navê xwe ji kovara "Ronahî" ya Celadet Bedirxan digre ku xebata dawî ya Celadet e. Hin agahiyên ku qala serboriya vê kovarê jî dike di heman nivîsê de cîh digrin.

Di beşê danasîna wênesazên kurd de jî, di vê hejmarê de qala hunermend Mahmut Celayir tê kirin û rûpela dawî ya rojnameyê jî bi afîş û plakatên fîlmên kurdî hatine xemilandin.

Di vê hejmarê de her wiha nivîsên Serge Halimi, Alexander Homann, Alfonso Artico, Marc Jacquemain, Olivier Bailly, Jacques Testart, Pierre Daum û Aurel, Nikolas Kozloff , Allan Popelard û Paul Vannier, Babak r El Bachadari, Colette Braeckman , Vincent Munié, Gilles Lapouge, Philippe Rivière, Laurent L. Jacque, Pierre Daum û Aurel jî, ku li ser meseleyen siyasî, civakî, çandî û hunerî yên navnetewî jî cîh digrin.

Ji bo kesên eleqedar malpera kovarê.
www.lemonde-kurdi.com