Diyarname

38'emîn Fûara Pirtûkan a Stenbolê bi merasimek dest pê kir. Di mesarima vekirinê de mêvanê rûmetê yê fûarê ê îsal Adnan Ozyalçiner axivî û got: "Heta ku pirtûk hebin dê fikir azad bibe, fikir azad bibe dê jiyan azad bibe. Em ji bo vê yekê li vir in."

38'emîn Fûara Pirtûkan a Stenbolê ku dê heta 10'ê mehê bidome îro vebû. Axaftina destpêkê ji aliyê rêvebereya TUYAP'ê Cemran Oder ve hat kirin. Oder piştî qala naveroka fûarê kir, bal kişand sen Nifşê 50'yî yên tirk û diyar kir ku ew koroyek ji solîsyan li vê derê dikin mêvan. Oder ji pirtûkhezan xwest ku rojeke xwe ji bo pirtûkan veqetînin.

Serokê Yekîtiya Weşangerên Tirkiyeyê (TYB) Kenan Kocaturk jî axivî û di axaftina xwe de bal kişand ser zehmetiya weşandina pirtûkan ku ev du sal in ji ber kaxiz tê îthalkirin, kaxizê yêrlî nîn e di nav zehmetiyan de ne.

Xwendin û fêmkirin

Kocaturk qaya daneyên welatên OICD kir, diyar kir ku di lîsteya wan de zarokên Tirk di warê xwendin û fêmkirina ji vê xwendinê de di rêza 50'î de ne û got ku divê çanda xwendinê bê pêşxistin. Kocaturk wisa got: "Wezareta Xwendinê ya Neteweyî divê xwendinê, pirtûkxaneyan pêş bixin. Divê zarok werin van pirtûkxaneyan, li dibistanan mamoste rê bidin ber zarokan."

Serokê TYB'ê Kocaturk bang li Serokê Weşangerên Dinyayêy ku ew jî li salonê amade bû kir û xwest ku sala 2020'an Stenbolê wekî Paytexta Pirtûk û Çandê bê qebûlkirin. Şaredarê Stenbolê Ekrem Îmamoglu ku derket ser dikê wî jî piştgirî da Serokê TYB'ê Kocaturk û got ku di vê warî de çi bar bikeve ser milên wan dê bikin.

Banga Paytexta Çandê

Îmamoglu diyar kir ku bajarê qîmetê nede pirtûkê ew qebûl nake û wisa dom kir: "Ev fûar nirxek mezin dide bajêr. Ji bo vê organîzasyonê emê gavên mezin biavêjin. Ji bo mirov bi rehetî herin û bên emê metroyê zûtir saz bikin. Min banga Serokê TYB'ê girt, em niha de eşkere dikin ji bo Paytextê Çandê em berendam in."

Îmamoglu diyar kir ku fikir û raman di asta navneteweyî de bê lê û layan divê azad be û Stenbol ji bo vê yekê amade ye.

Şaredarê Stenbolê Îmamoglu li ser avahiya Şaredariya Bajarê Mezin a li Saraçhaneyê ku vala dikin jî wisa got: "Em niha xebatek dikin ku beşek mezin a vê avahiya me bikin pirtûkxane û bikin navenda çand û hunerê. Ji bo vê yekê em xebatê dikin. Li ser navê demokrasiyê ev der gavek zûtir divê bikeve nav xebatê, di vî warî de emê her cure fedakarî bikin."

Têkiliya pirtûk û azadiyê

Fûar ku her sal nivîskarek wekî Mêvanê Rûmetê hildibijêre îsal nivîskar Adnan Ozyalçiner wekî mêvanê rûmetê hatiye diyarkirin. Ozyalçiner di destpêka fûarê de axivî û got ku wî li ser taxên li qeraxa Stenbolê nivîsiye, însan bi însanan, ligel civakê, bi nirxên wan, bi dewlemendî û xweşikiya wan aniye ziman, li ser wan nivîsiye.

Ozyalçiner li ser têkiliya pirtûk û azadiyê jî axivî û got: "Heta ku pirtûk hebin dê fikir azad bibe, fikir azad bibe dê  jiyan azad bibe. Em ji bo vê yekê li vir in."

Weşanxaneyên kurdan

Di fûara îsal de 11 weşanxaneyên kurdan hene. Weşanên Ar (salon 12), Aram (salon 2), AVA (No 2605 E), HÎVA (No 12508 E), J&J (No 2213 C), LİS (No 2104 F),  NÛBIHAR (No 2605 F), PÊRÎ (No 4103), PIRTUKAKURDÎ (No 12508 B), RÛPEL (No 2605 D), SÎTAV (No 12508 C) stand vekirine. Ji weşanxaneyên kurd ên her sal beşdar dibin Avesta û Peywendê îsal stand venekirine.

Her wiha ji bili van Weşanên Sor (No 3311) û Weqfa Îsmaîl Beşîkçî  (No 12510 E) jî standê vedikin.

**

Nûçeyên Eleqedar:

- Panel, gotûbêj û çalakiyên din ên li Fûarê 

- Weşanxaneyên kurd ên dê li Stenbolê standê vekin diyar bûn 

- Mêvanê rûmetê yê Fûara Pirtûkan diyar bû