AMED
Serokê Rêxistina BDP'ê ya Amedê Nijad Yaruk vexwendina Wezîrê Karê Hundir Beşîr Atalay red kir û wiha got: "Em meraq dikin ku Wezîrê Karê Hundirê ku dibêje, 'Bi şewitînin, xera bikin, hilweşînin' dê ji vî gelî re çi bibêje. Eger, AKP dixwaze tiştekî biguherîne, bila dev ji polîtîkayên xwe yên nijadperest û faşîst berde."
Rêxistina BDP'ê ya Amedê ya ku vexwendina Beşîr Atalay red kir, têkildarê vê mijarê li ber avahiya BDP'ê daxuyaniyek da çapemeniyê. Serokê Rêxistina BDP'ê Nijad Yaruk, di daxuyaniya ku gelek kes beşdar bûn de diyar kir ku berpisyarê van operasyonan Hikumeta AKP'ê ye.
Yaruk got ku zihniyeta AKP'ê li Enqereyê cuda, li Amedê jî cuda ye û ev yek lê zêde kir: "Ev zihniyet li Enqerê cuda li Amedê cuda diaxive û dixwaze ku gelê kurd bixapîne."
Yaruk got ku ew van hewldanan protesto dikin û bibîrxist ku Wezîr Atalay, nehiştibû hevserokên BDP'ê biçin Dortyolê. Yaruk, got ku wezîr bila pêşiyê hesaba destûr nedayîna nûnerên gel bide û wiha got: "Li gorî me beyî vê hesabê hatina wî manîdar e."