Amed
Baroyên herêmê li ser gotinên Recep Tayyîp Erdogan ên li hemberî Serokê Baroya Amedê Sezgîn Tanrikulu, daxuyanî dan çapemeniyê.

Di daxuyaniyan de gotinên Erdogan ên wekî, "Tu derewan dikî, tu ne durist î" wekî gotinên nayên qeûlkirin hatin nirxandin.

Serokatiya Baroya Amedê bi beşdariya hemû baroyên herêmê, li Navenda Perwerdehiyê ya Baroyê daxuyanî da çapemeniyê. Endama Lijneya Rêveberiya Baroyê parêzer Zulal Erdogan diyar kir ku gotinên Serokwezîr Erdogan di 8'ê avrêlê di dema hevdîtinê de anîne ziman, bêsiûdî ne û nayên qebûlkirin. Parêzer. Erdogan wiha axivî: "Berî her tiştî, di hevdîtineke li ser pirsgirêkên welat hatiye lidarxistin de helwesteke ku meseleyê takekesî dike, pêk hatiye. Gotina 'Tu derewan dikî, tu ne durist î' gotinek ku mirov nikare qebûl bike ye. Ev gotin ji devê Serokwezîr derketine, ev jî rewşeke xirabtir e. Ev hevok ji hêla Serokwezîr ve der barê mijarek hesas de hatine gotin û ji ber vê yekê gotinên bêsiûd in."

'Nêzîkatiya li hemberî pirsgirêka kurd xetere ye'

Di axaftina xwe de Erdogan balkişand ser nîqaşên der barê Xala 301'ê ya TCK'ê û wiha berdewam kir: "Di demeke nîqaşên wiha didomin de pêdivî bi nêrînek azadîxwaz û demokratîktir heye. Ev helwesta tund a li hemberî daxwazên demokratîk, baweriya me ya li hemberî rojên azad, qels dike. Serokwezîr bêtehamuliyeke mezin nîşan daye. Li aliyê din pirsgirêka kurd ku xwedî aliyên civakî, çandî, siyasî û aborî ye, lazim e bi berfirehî bê nîqaşkirin û çareserkirin. Tenê aliyê aborî dê vê pirsgirêkê ji holê raneke. Ev nêzîkbûna bi çavê aborî ji şêwaza ku hatiye nîşandan, gelek xirabtir e. Pirsgirêka kurd ku bi qasî dîroka komarê kevn e, hê wekî pirsgirêka aborî tê nîşandan. Ev nêrîn, gelek xetere ye û ne li gorî berjewendiya civakê û hêviya aştiyê ye."

Di daxuyaniya parêzer û rêveberên baroyê beşdar bûn de, Serokê Baroyê Tanrikulu cih negirt. Heman daxuyanî ji hêla 13 baroyên bajarên herêmê ve hate îmzekirin. Hate diyarkirin ku çend baro, wê daxuyaniya xwe cuda bidin.

Ji DÎHA'yê hatiye girtin