AMÛDÊ
Endamê Desteya Rêveber a TEV-DEM’ê Aldar Xelîl, diyar kir ku gelê Herêma Cizîrê bi tevlîbûneke mezin tevlî hilbijartinên şaredariyan bûye û bersiv daye derdorên siyasî yên ku dixwestin hilbijartin pêk neyên.
Piştî ku hilbijartinên meclîsên şaredariyan ên Kantona Cizîrê bidawî bûn, li Amûdê ku hemû sindoqên dengdayînê anîne wir, ji duh êvarê komîteyên Komîseriya Bilind a Hilbijartinan dengan di hejmêrin.
Di dema ku hejmartina dengan didomî de Endamê Lêvegera Siyasî ya Kurd û Endamê Desteya Rêveber a Tevgera Civaka Demokratîk (TEV-DEM) Aldar Xelîl ku ew jî li wir amade bû, li ser hilbijartinên ji endamên çapemeniyê re axivî.
Aldar Xelîl got ku ew pêkanîna hilbijartinên meclîsên şaredariyan wekî gaveke pir girîng dibînin û ev yek dibe bingeha kurkirin û xurtkirina çanda demokratîk ji bo herêmên Rojava. Xelîl got: “Ev hilbijartin tê wateya ku gelê herêmê bi xwe nûnerên xwe derdixe û çanda demokratîk xwe dispêre vê bingehê.”
Aldar Xelîl diyar kir ku wan dixwest her kes û partiyên siyasî di nava van hilbijartinan de hebin, lê dîsa jî welatiyên herêmê bi girseyên mezin beşdarî hilbijartinan bûne û tevlîbûneke wiha ji her kesî re diyar kirine. Xelîl li ser mijarê ev tişt anîn ziman: “Em niha di pêngava şoreşê de ne û li derdorên bajarê Serêkaniyê, Til Temirê û hin herêmên din şer û pevçûn hene. Tevî vê jî gelê me bersiva van helwestan da û got ‘Îradeya min ev e’. Bi vê yekê vîna xwe derxist holê û di hilbijartinan de helwesta xwe danî holê. Di welatekî ku aramî û ewlehî lê hebe jî, ancax ewqasî tevlîbûna hilbijartinan lê çêbibe.”
Xelîl da zanîn ku hin aliyan dexwestin ku hilbijartin pêk neyên û wiha dom kir: “Gelê me bi xwe bi vîna xwe ya azad bersiva van aliyan da û got ‘Hilbijartin tiştekî pir girîng e, divê em bi xwe nûnerên xwe diyar bikin’. Encama vê yekê jî berbiçav ji her kesî re diyar bû. Saetên ku ji bo hilbijartinê hatibûn diyarkirin, ji ber eleqeya zêde hatin dirêjkirin. Lê tevî ku dem hate dirêjkirin û ev dem bidawî bû jî, welatî hîn diçûn ser sindoqan û dixwestin dengê xwe bikar bînin. Ev yek îsbat dike ku gel ji derdorên siyasî yên dixwestin hilbijartin çênebin re got ‘Çênabe ku hilbijartin werin rawestandin û ez bi xwe piştgiriya van hilbijartinan dikim.”
ANHA