Diyarname
Îro salvegera wefata rewşenbîrê kurd Îbrahîm Ehmed e. Em wî bi hurmet bibîr tînin.
Rewşenbîrê kurd Îbrahîm Ehmed di sala 1914’an de li bajarê Silêmanî ji dayik bû. Li gorî gotina wî, dema Şêx Mehmûdê Berzencî hat ser hikûm, dibistan bûn bi kurdî û wî dibistana xwe ya seretayî bi kurdî xwend.
Îbrahîm Ehmed di dema xwendekariya xwe de zanîngeha hiqûqê xwend û bû parêzer, gelek salan parêzerî kir. Ew ji bilî parêzerî bi gelek karan re eleqedar bû û di nav kurdan de wekî parêzer, nivîskar, rewşenbîr, rojnameger û siyasetmedar tê nasîn.
Kovara bi navê Gelawêj ku Îbrahîm Ehmed di sala 1939’an de derxist di warê weşangeriya wî de gavake muhîm e.
Piştî Gelawêjê, wî di gelek weşanên din de jî cih girt. Wî, digel çîrok, serpêhatiyan, helbest jî nivîsîne. Romana wî ya bi navê “Jana Gel” kir ku ew li Bakur jî û li parçeyê din jî bê nasîn. "Jana Gel" yek ji romanên pêşîn ên kurdan e. Çapa nû ya "Jana Gel" par di nav klasîkên kurdan ên ku Weşanên Lîsê di bin navê "Pirtûkxaneya Ehmedê Xanî" de weşandin hate derxistin û bi kurmanciyeke xweşiktir gihîşt ber destê xwendevanan.
Îbrahîm Ehmed ku endamtiya PDK’ê, PWDK’ê û KNK’ê kir, di 8'ê gulana 2000’î de li bajarê Londona Îngilîstanê ji nava me bar kir.
Di salvegera wefata wî de em careke din wî bi hurmet bibîr tînin.
Hin berhemên Îbrahîm Ehmed:
Çîrok
- Yadgarî Lawan, (1933)
- Kwêrewerî (1944)
- Bawik û Kur (1979)
- Pirsey Şehîd (1980)
Roman
- Janî Gel (nivîsandin 1952, çapa yekem 1972)
- Dirk û Gul (nivîsandin 1961, çapa yekem 1991)
- Awat û Nahumêdî (1933, heta niha nehatiye weşandin)
- Herzekarî û Hejarî (1972, nehatiye weşandin)
- Jiyan û Xebat (1961, nehatiye weşandin)
Not: Navên berhemên Îbrahîm Ehmed ji wikipeida beşa îngilîzî hatine girtin