21.01.2018... 

Di êrîşa dewleta Tirkiyeyê ya li ser Efrînê de îro çi qewimî, li dinyayê çi deng derket? Vane hin notên îro:

Fransayê bang li NY'ê kir
Fransayê bang li Konseya Ewlehiyê ya Neteweyên Yekbûyî kir ku bi rojeva li ser Efrînê bicive. Wezîrê Karên Derve yê Fransayê Jean-Yves Le Drian got ku piştî bûyerên Efrîn û Idlibê, welatê wî bang li Neteweyên Yekbûyî kir ku bi awayeke lezgîn bicivin. Piştî vê bangê NY'ê biryar da ku roja 22'yê mehê li hev bicive.
Wezîrê Karên Derve yê Fransayê di peyameke xwe ya din de jî wisa got: "divê di cih de pevçûn bêne rawestandin û ji bo alîkariya mirovî firsend bê dayîn."

Swdê piştgirî da
Dewleta Swêdê jî piştî banga Fransayê daxuyaniyek weşand û diyar kir ku piştgirî dide banga Fransayê.

Misirê piştgirî da
Misirê li hemberî êrîşa li ser Efrînê nerazîbûn nîşan da, diyar kir ku ev serdestiya Sûriyeyê binpê dike û derseyê li têkoşîna li hemberî terorê ya li Sûriyeyê dike.

Almanya bertek nîşan da
Wezîrê Karên Derve yê Almanyayê Sigmar Gabriel li ser êrîşê wisa got: "Em bi metirsî qewimînên li bakurê Sûriyeyê dişopînin. Pevçûna di navbera Tirkiye û hêzên kurd de rîskên ku nayên texmînkirin di nava xwe de dihewîne."

Îran: Gavek zûtir êrîşê rawestînin
Li gor nûçeya ajansa fermî ya Îranê ÎRNA'yê Berdevkê Wezîrê Karên Derve yê Îranê Bahrem Kasimî wisa got: "Ji bo qeyraneke nû dernekeve Îran li bendêye ku Tirkiye dawî li tevgera xwe ya li sînorê Sûriyeyê bîne. Qeyrana ku li Efrînê çêbibe bi kêrî komên terorê yên li Sûriyeyê tê."

6 sivîl hatin kuştin
Îro li gundê Eynabkê de di encama bombebaranê de 6 sivîl hatin kuştin.  Rehef Hisên El Umer (33 salî), Waîl Hisên El Umer (yek salî), Hêdîl Hisên El Umer (10 salî), Selma Hisên El Umer (6 salî), Musab Hisên El Umer (6 salî) ku ew bi xwe koçberê ji Idbilê hatibûn Efrînê hatin kuştin. Hat gotin ku ji malbatê du kes jî winda ne.

Pevçûn û hin encam
Artêşa tirk ragihand ku îro bi balafiran li 35 hedefên YPG'ê dane
Fermandariya Giştî ya QSD`ê bi daxuyaniyek diyar kir ku herêmên ku artêşa Tirk û çeteyên ku dixwestin xwe lê bi cih bikin, hemû hatin paqijkirin. Hat îdîakirin ku 6 tangên dewleta Tirkiyeyê hatine rûxandin û hin leşker jî dîl hatine girtin.

YNK: Ger pêwîst bike emê hêz bişînin Efrînê
Îro piştî nîvro berpirsê desteya rêveber a YNK’ê Mele Bextiyar û berdevkê YNK’ê Sedî Pîre serdana nûnertiya Kantonên Rojavayê Kurdistanê li bajarê Silêmaniyê kirin.
Du nûnerên YNK’ê piştgiriya xwe ya ji bo Efrînê diyar kirin û gotin ku ger pêwîst bike wê hêz bişînin Efrînê.

Êrîşê şermezarkirinê kirin
Li Amed û Stenbolê gel xwest êrîşê şermezar bikin lê li her du aliyan jî polîsan êrîş kir û nehişt. Li Amedê polîsan berî saeta daxuyaniyê ber avahiya HDP'ya Amedê dagir kir û nehişt kes li hev bicive. Her wiha nehişt rêveber jî ji avahiyê derkevin derve.
Li Stenbolê jî kesên li Kadikoyê hatin ba hev rastî êrîş polîsan hatin. Bi dehan kes hatin binçavkirin.

Li Amûdê her kes li kolanê bû. Li gelek bajarên li Ewropayê jî çalakî hatin lidarxistin û êrîş hat şermezarkirin.

**

Nûçeyên Eleqedar:

- Rusya li ser operasyonê çi difikire? 

- Balafirên tirk herêma Efrînê bombebaran kirin (20.01.2018)

- Navdarên dinyayê ji bo Efrînê dest bi berhevkirina îmzeyan kirin