Diyarname

PYD, Partiya Demokrat a Pêşverûya ya Kurdên Sûriye, Partiya Demokrat a Kurdên Sûriye, Partiya Yekîtiya Kurdên Sûriye û Komîteya Dîplomasiyê ya TEV-DEM'ê ku duh daxuyaniyek hevpar dan, êrîşên dewelata Tirkiyeyê ya li ser Kantona Efrîn û Şehbayê şermezar kirin. 

Di daxuyaniyê de wisa gotin: “Dewleta Tirk hêza xwe ya leşkerî li herêmê bi cih dike û bi vê yekê prensîbên mafên mirovan, her wiha zagonên navneteweyî binpê dike. Li herêma Kerdag a girêdayî Efrînê bi deh hezaran koçberên ku ji bajarên cuda yên Sûriyeyê bi cih bûne. Efrîn bûye sembola jiyana hevbeş, biratiya gelan û şoreşa Sûriye ya aştiyane.

Ji destpêka aloziya Sûriyeyê û vir ve komên çekdar ên îslamî ambargo li ser herêmê ferz kirine. Ev yek bi destê Îxwan Muslimîn, Îtîlafa Sûrî û hikumeta AKP'ê pêk tê. Li aliyekî din jî êrîş li ser bajar û gundewaran pêk tên. Di encamê de şehîd û birîndar çêbûn. Her wiha li herêmên ser sînor, darên zeytûn û hinaran hatin birîn, berhemên çandiniyê hatin şewitandin û herêmên ku koçber lê bi cih dibin gulebaran kirin.

Em zêdekirina alav û wesayîtên leşkerî yên Tirkiyeyê li axa Sûriyeyê û topbarana herêmên sivîlan, şermezar dikin. Banga me ji raya giştî (taybet Amerîka û Rusya) û hêzên aştîxwaz re heye ku li hember êrîşên li ser Efrînê û Şahbayê berpirsyar bin. Her wiha em bang li hêz, partî û hemû welatparêzên kurd dikin ku li dijî êrîşên dijmin, yekîtiya xwe ava bikin, nakokiyên di navbera xwe de çareser bikin û piştgiriya hêzên YPG/YPJ/QSD'ê bikin.”

**

Nûçeya eleqedar:

- Bi 100 hezaran efrînî meşiyan