EFRÎN 

Bi sed hezaran gelê Efrînê li dijî êrîşên Tirkiye yên li ser Efrînê rabûn ser piyan û meşiyan. Gelê Efrînê peyama parastina axa xwe da. 

Li dijî bajarê Efrînê di rojên dawî de êrîşên Tirkiye jî zêde bûn. Hikumeta Tirkiyeyê xwe amade dike ku Kantona Efrînê dagir bike. Leşker li ser sînorê Efrînê hatiye bicihkirin û ev çend roj in bi topan êrîşî Efrînê dikin. 

Îro gelê Efrînê li hemberî vê yekê rabû ser piyan. Bi sed hezaran kes meşiyan û bertekên li dijî êrîşên Tirkiye bilind kirin. Gel bi pankart û diruşman dijî êrîş û dagirkeriyê sekinî.

Ji serê sibe ve ji gund û bajarokên Efrînê gel herikîn nava bajarê Efrînê û dest bi meşê kirin. Di meşê de hemû saziyên sivîl û leşkerî yên kantonê bi rengê xwe tevlî meşê bûn. Di meşê de posterên Rêberê PKK'ê Abdullah Ocalan û alên YPG, YPJ û QSD’ê hatin bilindkirin. Hêzên Asayîşa Efrînê jî meş parastin. Meşa ku di nav kolanên Efrînê de berdewam kir li ber Stadyuma 19’ê Tîrmehê bi dawî bû û li wir axaftin hatin dest pê kirin.

(Ev nûçe dema hat amadekirin axaftin hê dom dikirin)