Diyarname
Qeybî fînalê Kûpay Ziraatê ya Tirkiyeyê maçê peyînî hamey kaykerdişî. Maça jûyînan Konya de bî û Konya bi ser kewte, maça diyinan Stenbol de bî û Başakşehîr bi penaltiyan bi ser kewt. Maçe de tam 26 penaltî hamey eyştişî, peynî de Başakşehîrî Fenerbahçe şirawit keye.

Konya bi Aykut Kocamanî bi ser kuna
Maça jûyîne ya nîv fînalî vizêrî Konya de hamî kaykerdişî. Maça jûyîne Stenbolê miyanê Kasimpaşa û Konya de bî, Kasimpaşa bi 3-2 bi ser kewtebî. Maça diyînan Konya de bî û Konya bi 2-0 maçe girote. Konya bi nê skorî veciya fînal. Konya ke teknîk dîrektorê cê Aykut Kocaman o, di binê rêberî yê de her xo mocnena ra û rey joyînan vecêna fînal.

Fînalîstê duyemîn eyro veciya
Di maça diyinan a kûpa de eyro Fenerbahçe û Başakşehîr hamey hemberî jobînî. Maça jûyînan  bi 2-2 qediya bî û Fenerbahçe kê xo de bi avantaj bî. La Fenerbahçî no avantaj nêxebetna. Di deqîqey 43'nan de serê namey Başakşehîrî de Emre teberê sehay vernî qela de da goge ro, Volkan Demirelî xeta kerde û bî gol: 1-0. Mîney jîyin ana qediya, nîmey diyin de Fenerbahçî xo ver da û deqîqey 71 de bi Moussa Sow gol eyşte: 1-1.
Di des deqey peyînî yê maçe de wirdî tîman ataqê xo kerdî xurtî û deqey 86 de Başakşehîrî gole eyşte. Mustafa Pektemek pasêke mikemel Holmenî rê eyşt û yê skor berd 2-1. Tam Fenerbahçe şoq bîbî de nêşka vera gole hamî: Şener goge eyşte vernî qela, Van Persie da pero, Ozan Tufan nizdê qeda linge kerde derge û bî go: 2-2.
Maçe bi anekî qediya. Sedema maça joyînan jî 2-2 qediya bî 30 deqey zêdek hamey kaykerdişî. Di nê 30 deqe de rewş nêSbedeliyaû maça şî penaltiyan.
Penaltiya joyîne serê namey Başakşehîrî de Emre eyşte û bî gol. Penaltiya diyinan serê namey Fenerbahçî de Mousa Sow eyşte û bî 1-1. Wirdî hetan 13 penaltî eyştî. Di dewra verîne de lîstikvan nêmendî qeleciyan jî penaltî eyşte. Vernî de qelecî Başakşehîrî Volkan Babacan goga na caw sipê ser, da pero, goge dîreka corîne ra geyra a. Dima ra ew kewt qela, qelecî Fenerbahçî Volkan Demîrel goge girote. Da pero la eyşte teber. Dimara penaltî bînî dewam kerdî. Tam 26 penaltî hamey eyştişî, di penaltiya peyîne de Fenerbahçe ra Josef De Souza nêşka gole berzo û Başakşehîr şî fînal.
Fînal de Başakşehîr û Konya Spor go qeybî kûpa kay bikerê. Go tarîxê kayey fînalî û stado tede kay bikerê dimara TFF eşkere bikero.