Huseyîn Turhalli

Hikumeta AKP'ê û dewleta Tirk bi hemû sazî û sazgehên xwe li hemberî saziyên legal ên kurdan şer dane dest pê kirin; di rewşeke wisa de vekişîna HDP'ê ya ji Meclisê Mezin a Tirkiyeyê bi gurahî hate nîqaşkirin.

Dema bûyer û hebûn ji dîrokî veqetandî hatin nîqaşkirin wekî encam qutbûna ji mantiqê bi xwe re tîne.

Ji vir 28 sal berê me çima can û xwîn da yekemîn partiya legal a kurdan HEP'ê?

Tenê du sedemên me hebûn.

- Li ser navê kurdan nûnerên me hilbijartine biaxivin.

- Li hemberî êrîş û komkujiyên neheq hinên ku dengên me ragihînin hebin.

Ji bilî van tu bendewariya me nîn bû û ji bo vê yekê me xwîn da, can da. Bi mîlyonan ev helwdana pêşeng rast dît ku beşdarî vê bûn. Xwîn dan, can dan.

Ji HEP'ê heta HDP'ê bi daxwazên wisa biçûk mezin bû, mezin bû û li Kurdistanê bû desthilatdar.

Di dema ku bi 106 şaredarî û 80 mebûsan gihîşt temsiliyetek, ji ber dewlet êrîş dike çiqas rast e mirov dest ji van berde û here?

Tiştê ku AKP û dewlet dixwaze jî tam ev e.

Ji wê rojê û heta îro çi guherî?

Di rojên derbeyê yên 28 sal berê de hindek be jî ewlehiya hiqûqê hebû. Niha ew jî nîn e. Bi awayekî dewlet jî têk çûye. Di rewşek wisa de mirov nikare bibêje dîktatorî jî. Li hemberî me avahiyek zordar ku guh nade hiqûq û exlaqê heye.

Li Bakur bajaran xira dike, mirovan di jêrzemînan de dişewitîne, her roj bi dehan mirovan digire diavêje zindanan û her roj herî hindik cenazeyê 10 kurdî tê oxirkirin.

Rojava bi balafiran, bi tangan tê bombekirin, tê dagirkirin. Li Başûrê Kurdistanê jî dagirkirineke bêdeng heye.

Yanê rewşa 28 salan berê zêde neguheriye. Berevajî jê xirabtir bûye.

Di tevgerên şoreşger de boriyên nefesê ku jêre "coyên derve" tê gotin hene. Dema ev bixitimin girse bênefes dimîne û dimire. Hemû komkujî wisa çêbûne. "Qadên qedexe-qedexeya derketina kuçeyan" jî berdewama "qada girtî-erdnîgariya şewitî" ya ku li Dêrsim, Palû, Agirî, Zîlanê çêbûbû.

Mebûs, şaredar, dîaspora ji bo qadên ku hatine dorpêçkirin, ji bo qadên qedexe coyên hewayê, boriyên jê nefesgirtinê ne.

Em di bin hêrsa xwe de têk herin em nikarin siyasetê bikin. Di pevçûnê de yê ku herî zêde derban dixe ew kes e ku bi hêrs her radibe.

Gotina HDP projeyeke dewletê ye têrê nake. Ev gotin bêwate jî dixuye. HDP stargehek e ku kurdan ava kiriye, can û xwîn daye. Em dikarin ji bo vê bibêjin partiya Tirkiyeyê jî.

Ez wekî kesek ji van pêvajoyan re derbas bûme, hin kirinên taknîkî ne têde ez di siyaseta ku HDP dike de zêde şaşiyan nabînim.

Tiştê şaş di serî de siyaseta PKK'ê û siyaseta partiyên Kurdistanî ye. Ev siyaset divê xwe rast bikin û piştgiriyê bidin HDP'ê.

***

Wergera ji tirkî ji bo kurdî: Diyarname