NAVENDA NÛÇEYAN (DÎHA)
Gelek rêxistinên civakî Yên sivîl, partî, sendîka û rêxistinên pîşeyî qatlîama li Dîlokê şermezar kirin.
HDK'ê daxuyanî da
Hevberdevkên HDK'ê Gulîstan Kiliç Koçyîgît û Ertugrul Kurkçu bi daxuyaniyeke nivîskî weşandin û gotin:
"Di encama êrîşa terorê ya li dijî navçeya Şahînbey a Dîlokê gelek welatiyên me jiyana xwe ji dest dan û gelek welatiyên me birîndar bûn. Em kiryarên êrîşê û yên ku ji bo vê zemîn ava kirin şermezar kirin. DAIŞ a ku li Sûriyeyê darbeyên giran xwar ev êrîş pêk anî û bi vî rengî tê xwestin ku bingeha pevçûnan bê avakirin. Divê ji bo êrîşên li dijî gelê me hikumet tedbîrê bigire, kiryaran derxe holê."
Di vê navberê de Kurkçu jî di nav heyeta HDP'ê de çû Entabê.
ÎHD'ê êrîş şermezar kir
Komeleya Mafên Mirovan (ÎHD) jî êrîş şermezar kir û got ku Dîlok bi salan e bûye cihê hêlîna DAIŞ'ê. Di daxuyaniyê de wiha hat gotin: "Welatiyên me yên li vî bajarê dijîn ev demeke ku rewşekî ku DAIŞ bi endan, çek û xebatên xwe ve xwe nîşan dide ve jiyan dikirin. Di îdîanameya qetlîama Enqereyê de tê gotin ku li Dîlokê li dijî daweteke kurdan plana êrîşê heye. Lê desthilatdarî ji bo pêşiya vê yekê bigire tu gav neavêtiye."
Di daxuyaniyê de hat gotin ku hat gotin ku di şeva ku deklerasyona KCK'e hatibû eşkerekirin êrîşeke bi vî rengî watedar e û wiha got: "Heke em bînin bîra xwe berî mehan di 10'ê kewçêra 2015'an de di mîtînga aştiyê ya Enqereyê de bombeyên ku teqiyan jî piştî biryara bêçalakîbûnê ya KCK'ê bû. Nîqaşên aştiyê û çareseriyê hatibû astengkirin û ji vî rewşê dûrketin çêbûbû."
Di berdewama daxuyaniyê de wiha hate gotin: "Tu ferqa vî êrîşê ji êrîşên li dijî kantonên Cizîr, Efrîn û Kobanî yên Rojava tune ye. Çeteyên cihadî li dijî kurdan û şoreşger û demokratên bi kurdan re tevdigerin dikin hedef, ev di 5'ê pûşpera 2015'an de li Amedê dest pê kir, di 20'ê tîrmehê de li Pirsûsê, di 10'ê kewçêrê de li Enqereyê, li Sultanahmet û Îstîklala Stenbolê ve berdewam kiriye.
'Berpirs hikumet e'
Hevserokatiya Konseya Rêveber a KCK'ê jî daxuyaniyek nivîskî weşand û got: "Ev komkujî ji aliyê kê ve hatibe kirin jî, berpirsyar AKP ye. Komkujî ji aliyê DAIŞ'ê ve hatibe kirin jî, berpirsyar dîsa desthilatdariya AKP'ê ye."
Em ji malbatên şehîdan û tevahiya gelê xwe re sersaxiyê, ji birîndaran re jî şîfa xêrê dixwazin."
Serokê ODP'ê Alper Taş diyar kir ku pêdiviya me hemûyan bi aştiyê heye, di vî warî de gotina KCK'ê ku ji bo maseyek nû amade ye girîng e û divê tecrîda li hemberî Abdullah Ocalan bê rakirin. Her wiha Taş got ku ew wekî ODP alîgirê çareserkirina pirsgirêka kurd bi rêya demokratîk in û her tiştê ji destê wan bê dê bikin.
Seroka EMEP'ê Selma Gurkan jî diyar kir ku divê banga KCK'ê hikumek bibîne. Gurkan diyar kir ku ev êrîşa li Entabê piralî ye. Êrîşên wisa dibin sedemên gelek şikestinan û pêşî li demokratîkbûnê jî digirin.
Berdevkê Bloka Aştiyê Bahadir Altay jî bang kişand ser gotina KCK'ê, gotina Serokwezîrê Tirkiyeyê Binali Yildirim rexne kir û got: "Ev helwesta wî helwesta aştiyê red dike bû. Ne hewceye hê zêdetir mirov bimirin. Dema xwetêrkirina ji xwînê bê redkirin dê aştî bê. Gere em ji vir derkevin, her kesê kedê bide aştiyê divê pêşî li wan bê vekirin.
**
Nûçeyên Eleqedar:
- Demîrtaş: Werin em vê bikin deriyê sibeyek wekhev û adil
- Cenaze ji bo definkirinê dibin Goristana Yeşîlkentê
- Ji çapemeniya dinyayê komkujiya Entabê