Diyarname

Li Îngilistanê ji rojnameyan ji yên muhîm jî The Indenpendent e. Rojnameya ku ev 20 sal in weşanê dike îro bi hejmara xwe ya nû dawî li weşana xwe ya çapkirî anî. Rojname dê tenê wekî online weşana xwe bidomîne.

Di vê hejmara xwe ya dawî de rûpelek vala wekî manşet bikar anî û li ser "Stop Press" (Çapê Rawestînin) û binê wê de jî salên "1986-2016" ku sala destpêkirina weşanê û dawîlêanînê nivîsî. Di rojnameyên de bergên cur bi cur ên salên berê jî hatin weşandin. Rojnameyê wekî bîranîn paşgoyek 16 rûpelî jî derxist.

Di nivîsa sernivîskar de wisa hat nivîsîn: "Bi awayekî dilpola ji vir ketina nav çapemeniya înternetê dê dîrok bidarizîne û rojnameyên din ên li dinyayê jî dê bidin dû vê mînakê."

Her wiha di nivîsê de ev jî hatin gotin: "Çap rawestiya, hubir ziwa bû û di nêzîk de kaxiz jî nequrmiçe. Lê dema ku serdemek tê girtin yeka din vedibe û rihê The Independentê didome. Karê me didome, mîsyona me hê sing dide ber, şer gur dibe, dê xeyala avakarê me qet nemire."

Di dawiya paşgoyê de jî li ser fonek reş bi nivîsa spî ev hat nivîsîn: "Vê rojnameyê di bin edîtoriya neh edîtorên cuda de bi ser 10 mîlyar hebî zêdetir re peyv weşandin. Nûçeyên pênc serketin û têkçûnên Serokwezîrên Îngilistanê û pênc Serokdewletên DYA'yê nivîsî. Dawiya Komunîzmê, vejîna Îslama radîkal û hema bêje têkçûna bankeyên global dît, her wiha ji bilî van dikare hin şer jî bê jimartin. (...) Serjimariya Îngilistanê ji 56 mîlyonî derket 63 mîlyonî. Bikarhênerên Facebookê li Îngilistanê ji 0'ê derket 12.4 mîlyonî. Temamê tîroja rojnameyan li Îngilistanê ji 15 mîlyonî daket 8.5 mîlyonî."

Di vê navberê de xebatkarên rojnameyê ku biryar ne bi dilê wan bû li navenda rojnameyê li maseyan dan û ev biryar şermezar kirin. Tê gotin ku bi rawestandina çapa kaxiz re dê hin xebatkar jî ji kar bêne derxistin.

Radikal têk çû!

Li Tirkiyeyê rojnameya Radîkalê jî çend sal berê dest ji çapê ber dabû û tenê li ser înternetê hatibû weşandin. Lê malperê roja 25'ê adara 2016'an dawî li weşana xwe anî û Radikal bi temamî bû dîrok. Niha dê The Indenpendent çi bibe kes nizane, lê dîrok dê binivîse ku ev biryara wan rast bû yan na.