Fehîm IŞIK
Hefteya çûyî, ez û çend hevalên rojnameger ên ji rojname û malperên cuda, wekî nobedara nûçeyan li herêmên şer lê heye bi hempîşeyên xwe re xebitîn. Derdê me ne ew bû ku em xwe derxin pêş. Derdê me, hevalên me bûn; ew ên ku di rewşa herî zor de nûçeyan çêdikirin, ew bûn. Me dixwest em bal bikşînin rewşa hevalên xwe.
Em wekî koma dûyemîn hatin piştgiriya hevalên xwe. Diyar e ev çalakî, ew ê çend hefteyên din jî bidome. Di koma duyemîn a nobedara nûçeyan de me ewilîn hevdîtina xwe bi hevalên Rohat Aktaş re çêkir.
Li rojnameyên din de çawa ye nizanim, lê di rojnameyên kurdan de baş dizanim ku midûrên nivîsan pirî caran ên herî ciwan in. Ên rêveberiya fermî ya rojnameyên kurdan dikin, her wisa berdêla herî mezin hildigirin ser milên xwe. Hin caran bi salan ceza didin van rêveberan. Ev hevalên me yên ciwan bi rêveberiya fermî dest bi kar dikin û ger ji cezayên dewletê xilas bibin, di vê navberê de rojnamegerî jî pêşve bixin, dikarin bibin yek ji esasên saziyên xwe.
Rohat Aktaş jî ciwanekî wisa bû û wekî midûrê nivîsan li Azadiya Welat dest bi karê xwe kiribû.
Di ewilîn hevdîtîna koma duyemîn a nobedariya nûçeyan de me rewşa Rohat Aktaş, pirsî. Wekî tê zanîn Rohat, li Cizîrê di jêrzemîna ewil de asê mabû û birîndar bû. Bi qasî ku wî bi xwe agahî daye, birîna wî ew qas ne giran e. Di vê navberê de çend car bi rêya telefonê bi hevalên xwe yên Azadiya Welat re û carek jî bi diya xwe re axivî ye. Di her axaftinên xwe de bal kişandiye kiryarên qirêj ên hêzên dewletê û gotiye, “Hêzên dewletê dixwazin me teva bikûjin.” Di axirîn hevdîtîna xwe ya bi telefonê de hem ji hevalên xwe re, hem jî ji diya xwe re, bêtirsiya xwe eşkere gotiye û tenê rêyek nîşanî gel daye: Berxwedan…
Niha ji van ciwanên me, ne tenê hempîşeyê me her wiha rêhevalê me, ji Rohat Aktaş me tu agahî tune ye. Li Cizîrê hêzên dewletê qetlîamek pêk anîn. Bi qasî ku tê zanîn ji 138 kesan çi agahî nayê wergirtin. Her wiha herî kêm 110 cenaze li nexweşxaneyan de ne. Piraniya van cenazeyan hatine şewitandin û nayên naskirin.
Dibe ku yek ji van kesên ku bi destê hêzên dewletê û bi awayekî hovane hatiye qetilkirin Rohat Aktaş be.
Ji bo agahiyên rastîn ên Cizîrê werin bihistin wî bi dilekî hêsan berê xwe dabû Cizîrê. Dixwest rastiya berxwedana Cizîrê, rastiya xwînxwarî û bêwijdaniya dewletê bigihîne dinyayê. Ji bo wî jî li Cizîrê ketibû pey nûçeyan.
Lê niha, em ketine pey wî da ku em bizanibin wan xwînxwar û hovan çi anîne serê wî û hevalên wî. Dibe ku em niha ji Rohatê xwe haydar nebin, lê qet şik nîn e, ew ê dîrok rojek Rohatan jî, xwînxwar û hovan jî binivîsîne. Ew ê Rohatan her tim bilindahiya me bin…
16.02.2016, Azadiya Welat