Cemil Oguz

Fîlmekî çiqas dikare rewşa ajanên ku ji bo her du aliyan dixebitin bîne ziman? Fîlmê "50 mirovên mirî" li ser vê yekê dixebite û çîroka Martin McGartland ê IRA'yî ku hem ji bo IRA'yê hem jî ji bo îstîxbarata Îngilistanê dixebite tîne ziman.

Artêşa Rizgariya Îrlandayê bi navê ku herî zêde tê nasîn  IRA (Irish Republican Armynin) ji bo Bakurê Îrlandayê ji Qraliyeta Yekbûyî veqete û bibe serbixwe di sala 1969'an hate avakirin. IRA'yê heta sala 2005'an têkoşîna xwe ya çekdarî dom kir û ji wê rojê vir de zêdetir baskê xwe yê siyasî Sinn Fein derxistiye pêş.

IRA ku di salê 1970'yî de bi bûyerên ku li Belfastê derketin hêzdar bû, di sala 1980'yan de navê wê li hemû dinyayê belav bû. IRA ku bi çalakiyên birçîbûnê, çalakiyên bombeyî rojeva dinyayê mijûl kiribû bi ajanên ku îstîxbarata Îngilistanê şandine nava wê jî rojeva dinyayê mijûl kir û ev yek hê jî diddome. Heta niha gelek navên di nav IRA'yê de ku ji bo îstîxbarata Îngilistanê dixebitin derketin holê, li ser wan fîlm hatin kişandin. Mînaka dawî jî fîlmê "50 mirovên mirî" (FIFTY DEAD MEN WALKING) ye ku niha di 28'emîn Festîvala Fîlman a Navneteweyî ya Stenbolê de tê nîşandayîn.

Fîlmê "50 mirovên mirî" ku di Festîvala Vencover 2008 de Xelata Fîlmê Herî Serketî girt çîroka Martin McGartland ku hem di nav IRA'yê de têdikoşiya û gav bi gav pêş ve diçû, hem jî ji bo îstîxbatara Îngilistanê dixebitî pêşkêş dike.

Di sala 1987'an de ajaneke îngilîz li Rojavaya Belfastê Martin McGartlandê ciwan ji bo ku ji nav IRA'yê agahiyan jêre bîne digire kar û McGartland heta 1991'ê vî karî dike. McGartland dema ji bo her du aliyan dixebite dikeve ser rêyeke ku nikare êdî jê vegere. IRA bibihîze kesek ajan e teqez wî/ê dikuje û ger navê wî jî bê bihîstin êdî dê ew "kesek mirî" be.

Mirov dikare çawa li her du aliyan jî bixebite, îstîxbaratek çawa kesan dişîne nava rêxistinek di fîlmê de mirov dikare bi rehetî bibîne; di heman demê de xidariya, bêrehmiya her du aliyan jî xwe nîşan dide.

Her çiqas fîlm car bi caran alîgirê îngilîz bixuye jî bi giştî bi awayekî objektîf meseleyê pêşkêş dikeb

Fîlmê ku ji pirtûkê bi heman navî hatiye girtin derhêneriya wî Kari Skogland kiriye û Ben Kingsley, Jim Sturgess, Kevin Zegers têde lîstiye.

Jim Sturgess ku bi rola Jude yê di fîlmê "Across the Unuverse" gaveke mezin avêt nav sînemagerî, çîroka Martin McGartlandê ku di sih salên dawî yên Bakurê Îrlandayê de xwedî taybetiyeke cihê ye dilîze. Ji bo kesên ku ji sînemaya polîtîk hez dikin fîlmekî girîng e "50 mirovên mirî".
Wekî notek: Martin McGartland ku jiyana wî bûye mijara fîlm hê jî dijî û xwe ciheke veşartiye.

Fîlmê ku di 6 û 9'ê mehê de li festîvalê hat nîşandayîn di 12'yê mehê de jî dê bê nîşandayîn. Ji bo yên ku bixwazin di 12'ê mehê saet 19.00 de li City Life ya Nişantaşiyê tê nîşandayîn.

***

Nûçeyên din ên li ser 28'emîn Festîvala Fîlman a Navneteweyî ya Stenbolê:

- John Malkovich tê Stenbolê

- "Welcome" û penaberên kurd

- Festîvala Fîlman a Stenbolê dest pê kir 

- Bilêtên fîlman li benda we ne

- Bernameya Festîvala Fîlman a Stenbolê eşkere bû