HEDIYE ABÎŞ - M.EMÎN YILDIRIM

Îsal 9’emîn Mîhrîcana Çand û Hunerê ya Amedê di 27’ê gulanê de dest pê dike. Mîhrîcana ku 4 rojan dê dom bike bi temaya jin, zarok û aştiyê tê lidarxistin.

Li Amedê ji sala 2001’ê ve her sal wekî kevneşopiyekê mîhrîcana çand û hunerê tê lidarxistin. Mîhrîcana îsal dê roja 27’ê gulanê dest pê bike. Di mîhrîcanê de dê aktîvîteyên çandî yên wekî panel, konser, semîner, gotûbêj û hwd. bên lidarxistin.

Jin, zarok û aştî
Temaya mîhrîcana îsal jin, zarok û aştî ye. Ji ber ku gelê kurd di pêvajoyeke dijwar de derbas dibe, temaya mîhrîcanê jî li ser vî esasî hatiye diyarkirin. Ji aliyekî jin rastî şîdeteke dijwar tên, li aliyê din zarokên kurd li ber kamerayan destên wan têne şikandin û serên wan bi qontaxên çekê têne pelçiqandin û ji aliyê din ve jî ligel biryara bêçalakatiyê ya Koma Civakên Kurdistanê operasyonên artêşa tirk berfireh dibin. Ji bo bala raya giştî bikişîne ser van mijaran mîhrîcan bi van  temayan tê lidarxistin.

Konserên rengîn
Li gorî agahiyan dê konsera destpêka festîvalê bi konsera ku ji jinên hunermend ên kurd, tirk û lazan pêk tên bê lidarxistin. Her wiha di konsera dawî ya festîvê de jî dê koroya ku ji hunermendên NÇM’ê yên berê û niha pêk tê, hunermendên Akademiya Kurd, komeke ku ji Baskê tên stranên xwe yên şoreşgerî bistrên. Hunermendên NÇM’ê dê stranên xwe yên ji sala 1991’yê heta 1999’an gotine dê bistrên. Stranên wê demê wekî stranên berxwedan û serhildanê têne zanîn. Her wiha koroyên zarokan ên NÇM’ê û şaredariyên DTP’ê jî derkevin ser sahneyê.

Panel, gotûbêj û semînerên ku li ser van êrîşên dawî yên li hemberî gelê kurd bêne lidarxistin dê gelek akademîsyen, profesor, rojnameger û parlamenter beşdar bibin. Di mîhrîcanê de çalakiyên ji bo zarokan jî hene, wekî berdena hewayê ya nepoxan û tiştên bi vî rengî.

Atolye hatine vekirin
Îsal wekî her sal dê atolye jî bêne sazkirin. Di vê çarçoveyê niha atolyeya defê dest bi xebatên xwe kiriye. Her wiha dê atolyeyên peyker, sînema, wêne, şano jî bêne sazkirin.

Her sal bi şîareke cuda
- 1’emîn Mîhrîcana Çand û Hunerê ya Amedê di navbera 26’ê gulanê û 3’yê pûşpera 2001’ê de hate lidarxistin. Di mîhrîcana yekem de şîarek nehatibû diyarkirin.
- 2’yemîn Mîhrîcana Çand û Hunerê ya Amedê di 25 gulan-2 pûşpera 2002’yan de bi şîara “Amed deriyên xwe ji hunerê re ji nû ve vedike” hate lidarxistin.
- 3’yemîn Mîhrîcana Çand û Hunerê ya Amedê di 24 gulan-1 pûşpera 2003’yan de bi şîara “Ligel her tiştî dîsa huner” hate lidarxistin.
- 4’emîn Mîhrîcana Çand û Hunerê ya Amedê di 28 gulan-6 pûşpera 2004’an de bi şîara “Sûr razên xwe parve dikin” hate lidarxistin.
- 5’emîn Mîhrîcana Çand û Hunerê ya Amedê di 28 gulan-4 pûşpera 2005’an de bi şîara “Deng û reng ber bi aştiyê ve” hate lidarxistin.
- 6’emîn Mîhrîcana Çand û Hunerê ya Amedê di 31 gulan-4 pûşpera 2006’an de bi şîara “Em di rengên keskesorê de bigihîjin hev” hate lidarxistin.
- 7’emîn Mîhrîcana Çand û Hunerê ya Amedê di 30 gulan-3 pûşpera 2007’an de bi şîara “Ji bo huner û demokrasiyê mîhrîcan” hate  lidarxistin.
- 8’emîn Mîhrîcana Çand û Hunerê ya Amedê di 27 gulan-1 pûşpera 2008’an de bi şîara “Ziman û çanda te hebûna te ye” hate lidarxistin.

Ji malpera Azadiya Welat hatiye girtin