Çewlig
Li Çewligê, DTP'ê bi beşdariya zêdeyî 20 hezar kesî mîtîngeke li dar xist. Hevserokê DTP'ê Ahmet Turk xwest ku gora Şêx Seîd bê dîtin.

Hevserokê DTP'ê Ahmet Turk, parlamenterên DTP'ê Sevahîr Bayindir, Aysel Tugluk, Bengî Yildiz û Salahattîn Demîrtaş ku di çarçoveya gera herêmê de çûn Çewligê, li navçeya Solaxan a Çewlekê ji aliyê konvoyek ji sedan wesayîtan pêk hat ve hatin pêşwazîkirin. DTP'iyên ku derbasî Çewligê bûn, tevlî mitînga li sêgoşeya PTT'ê hate lidarxistin bûn. Zêdeyî 20 hezar kesî tevlî mitîngê bûn. Li qada diruşmên "Deng namûs e namûs nayê firotin", "Ji bo azadiyê deng ji Firat re" hatin avêtin.

Omer Faruk Ersoz ku namzetiya wî ji aliyê YSK'ê ve hate betal kirin di destpêka mitîngê de axivî, piştgiriya xwe ji bo berendamê niha Firat Anli kir û wiha got: "Çi ez çi Firat. Em yek in, ji bo me ferq nake. AKP'ê li vî bajarî hilbijartinek pêş pêk anî. Dengên xwe di Pira Gumuşkurê de avêt avê." Namzetê Şaredariya Çewlikê yê DTP'ê Firat Anli jî, diyar kir ku divê êdî ev qadên han hînî wan bibin û wiha axivî: "Ev sêyemîn hatina me ya cem hev e. Bi deh hezaran kes li qadan e. Di 29'ê adarê de ji bo telafîkirina neheqiya li dijî Ersoz hate kirin em dê dengê xwe li gulên sor bixin. Gelê Çewlikê di 29'ê adarê de dê bi xizmata şaredariyê re bê nasîn."

'Çavên xwe ji bo projeyên çareseriyê girtin'

Hevserokê DTP'ê Ahmet Turk jî, da zanîn ku wan li hemberî çeteyên 12'ê Rezberê û Ergenekonan bejna xwe natewandiye û natewînin. Turk, destnîşan kir ku wan ji bo pirsgirêka kurd projeyên çareseriyê danîn holê, lê belê çavê xwe girtin. Turk wiha got: "Me projeyên çareseriyê danîn holê. Lê belê çavê xwe girtin û li hemberî projeyên me bi êrîş, operasyon û înkarê xwestin pirsgirêka kurd çareser bikin."

Ahmet Turk, destnîşan kir ku ji bo xwîn raweste, leşker û gerîlla neyên kuştin têkoşînek mezin meşandine û wiha axivî: "Me got em li paşeroja xwe bipirsin û li ser heqîqetan lêkolînê bikin. Me xwest komîsyona lêkolîna heqîqetê ava bibe. Lê belê guhê xwe û çavê xwe girtin. Em ji Serokwezîr re dibêjin nebe Fatîhê Dawosê. Em dibêjin bibe mirovê aştiyê."

'Xewna me, xewna aştiyê ye'

Turk, ji bo gora Şêx Seîd bê dîtin bang li hikûmeta AKP'ê kir. Turk, nakokiyên hikumeta AKP'ê jî rexne kir û wiha axivî: "Li aliyekî destûr dide weşana kurdî, li aliyê din li ser kurdî doz li me têne vekirin. Ev me û gelê me dixapînin. Yên ku weşana bi kurdî dixwazin em in. Ew bi vekirina TRT 6'ê yekîtiya me xera dikin. Dema em zimanê dayika xwe diaxivin doz li me têne vekirin. Serokwezîr nasname, çand û zimanê vî gelî înkar dike. Di îslamiyetê de ev yek tune. Xewna me xewna azadî û aştiyê ye. Ez dîsa bang li Serokwezîr dikim. Pirsgirêka kurd bi înkar û îmhayê çareser nabe. Pirsgirêka kurd li Amerîka û Iraqê çareser nabe. Pirsgirêka kurd bi kurdan çareser dibe."

Turk bang li gele Çewligê jî kir û diyar kir ku hilbijartina 29'ê Adarê ne mijara şaredar û parlementeriyê ye û wiha got: "Em dê di 29'ê Adarê de bi biryara gel hêza xwe bidin nîşan."