Diyarname

Kovara navdar a almanî Der Spiegel derbarê gefên Serokomarê Tirkiyeyê Recep Tayyip Erdogan û rewşa li bakurê Kurdistanê de ev du roj in li ser hev nûçeyan belav dike. Der Spiegelê bi sernivîsa “Erdogan partiya alîgirê kurdan HDP'ê tehdît dike“ îro nûçeyek weşand. Di nûçeyê de tê gotin ku partiya muxalîf HDP xweseriyê ji bo herêmên kurdan li Tirkiyeyê dixwaze û ji ber vê egerê Serokomar Erdogan Hevserokê HDP'ê Demirtaş bi îxanetê tewambar dike: “Erdogan tehdît dike û dibêje gel û dad wê dersekî bidinê. Tişta ev hevserok dike îxanet e, provakasyoneke vekirî ye."

Di heman nûçeyê de xwendevan têne agahdarkirin ku dozgeriyê ji ber daxuyaniya Demirtaş a derbarê xweseriyê ya li herêmên kurdan de lêpirsîn daye destpêkirin.

Di berdewamiya nûçeyê de wiha tê gotin: “Demirtaş roja yekşemê di axaftineke xwe de bi awayekî ne rasterast behsa Erdogan kiribû û gotibû divê kurd biryara xwe bidin ka dê ji bo xweseriyê xebatê bikin an jî di bin desthilatdariya despotiya zilamekî de jiyana xwe bidomînin."

Ji hêla din ve doh jî heman kovarê di malpera xwe ya înternetê de cihekî berfireh dabû bûyerên ku li bakurê Kurdistanê diqewimin û encamnameya kongreya KCD'ê. Di nûçeya bi sernivîsa “Erdogan di şerê xwe yê li dijî kurdan de destê DAIŞ'ê xurt dike" xwendevanên xwe derbarê rûdanên li bajarên kurdan diqewimin de agahdar kiribû. Derbarê rûdanan de wiha tê gotin: "Li başûrê rojavayê Tirkiyeyê bi sedan mirov hatin kuştin û hikumet heta rûniştina bi parlamenterên kurd re jî red dike. Di heman demê de DAIŞ li Tirkiyeyê ketiye nêçîra dijberên xwe."

Bi taybetî derbarê êrîşên hêzên dewletê yên li Cizîrê de jî rewş wiha hatiye bilêvkirin: “Navenda şer bi giranî bûye Cizîr. Bajar ev bi hefteyan e ji hêla artêşê ve hatiye dorpêçkirin. Li wir dawiya hefteyê mêrekî 73 salî ligel neviya xwe ya 3 mehî hate kuştin. Li gor ahgahdariyên malbatê, ew ji aliyê nexweşxaneya Cizîrê ku leşker li wir bi cih bûne hatine gulebarankirin“

Wergera ji almanî: Zekî Ozmen