Diyarname
Bi tirkî jêre "Havuz Medyasi" tê gotin, di nav vê çapemeniyê de gelek rojname û televîzyon hene. Di van demên dawî de rojnameyên vê "Havuz Medyasi" hem HDP bi xwe ji bo xwe kirine hedef, hem jî yek bi yek mebûsên HDP'ê dikin hedef û nûçeyên derew li ser wan saz dikin. Yek ji van mebûsên HDP'ê ku bûye hedefa vê çapemeniyê jî Faysal Sariyildiz e. Sariyildiz ku yek ji mebûsên kurd ê herî zêde di nav gel de ye. Ev çapemenî li ser Sariyildiz nûçeyên derewîn diweşîne. Demek berê vê çapemeniya nêzî AKP'ê nivîsî bû ku Sariyildiz ji Rojava çek anîne Bakur, lê Sariyildiz ew derewîn derxistibû.
Roja 12'yê mehê jî vê çapemeniyê nûçeyên bi sernavê "Mebûsê HDP'ê bilezgînî alîkariya terorîst kir" nûçe weşandin. Li ser vê yekê Sariyildiz daxuyaniyeke nivîskî weşand, hem qala rastiya meseleyê kir û hem jî derewa vê çapemeniyê raxist holê.
Sariyildiz li ser meseleyê wisa got: "Roja 10.08.2015'an li Taxa Başak a Silopiya Şirnexê piştî teqînekê polîsan gule bera gel dan, ciwanekî bi navê Temer Şeflek birîndar bû. Ji ber ku polîsan dor li taxê girtibû demek dirêj ciwan ranekirin nexweşxaneyê. Dema ez li Şaredariya Silopî bûm xeber hat ku ji ciwanan yek birîndar bûye lê ambulans nehatiye. Li ser vê yekê em gelek caran li 112 geriyan û me xwest ambûlansê bişînin. Lê kesê li ser telefona 112 got ku polîs nikarin ewlehiya ambûlansa ku here wê derê bigire. Bavê Temer Şeflek bi feryad ji bo me got ku dê kurê wî ji xwînjêçûnê bimire, ji me xwest ku em wî bibin nexweşxaneyê. 15 deqe bi ser bûyerê re derbas bû hê ambûlans nehatibû. Ez û mebûsa me ya Şirnexê Aycan îrmez em çûn cihê bûyerê, min ciwanê birîndan bi erebeya xwe bir Nexweşxaneya Dewletê ya Cizîrê."
Sariyildiz got ku ev çapemeniya tetikkêş a AKP'ê roja 7'ê mehê Hamdin Olaş ê ku birîndar bû lê ji aliyê polîsan ve hatibû înfakirin wekî endamê YDG-H'ê nîşan dabû, vê çapemeniyê Temer Şeflek ê sivîl jî wekî terorîst nîşan daye.
Her wiha Sariyildiz got ku li hemberî vê weşanê, li hemberî van şerxwazan emê daxwaza xwe ya aştiyê bidomînin û ew dengê aştiyê rojekê dê dengê van bin pê bike.