ENQERE

Heyeta Îmraliyê li ser rewşa dawî daxuyaniyek da çapemeniyê û got ku tecrîda li ser Rêberê PKK'ê Abdullah Ocalan  amadekariyên şer ên hundir û derve ye. Heyetê got ku hikûmet vê pirsgirêkê wekî amûrekî bazara koalîsyonê bikar tîne û li hemberî vê yêkê bang li hêzên aştî û demokrasiyê kir ku eniya aştiyê ava bikin. Heyetê wisa got: "Hê em dereng nemane û hê tiliya welatiyekî me bi xwîn nebûyî pêdivî bi pêngaveke aştiyê ya heremî heye."

Heyeta Îmraliyê têkildarî operasyonên tên lidarxistin, lêgerînên şer û tecrîda li ser Rêberê PKK'ê Abdullah Ocalan daxuyaniyekî nivîskî weşand. Di daxuyaniyê de hat diyarkirin ku li sed xitimîna pêvajoya çareseriyê ya ku ev 2 meh in berdewam dike me wekî heyetê gelek ked da ku pêşiya vê bê vekirin. 

Heyeta Îmraliyê got ku di hevdîtina dawî ya li Îmraliyê di navbera Ocalan û Dewletê de pêk hat biryara avakirina Heyeta Şopandinê hatibû girtin û wiha dom kir: "Piştî danezana birêz Ocalan ku ji bo Newrozê amade kiribû û li wir hat xwendi dê Heyeta Şopandinê ava biba û ew heyet dê biçûya giravê. Biryar wisa bû. Bi vê re dê muzakere bi awayekî fermî dest pê bikira û heke mutabakat li ser rêgezên muşterek pêk bihata dê birêz Ocalan bang li PKK'ê bikira ku li şûna têkoşîna çekdarî têkoşîna siyaseta demokratîk bikin û li ser vê esasê kongreyê kom bikin. Metna mutabakata Dolmabahçeyê, hemû pevçûnên civakî yên di dîroka Komarê de bi aştiyê bi dawî bibin û bi demokrasiyê tacî bibin gavekî girîng û yekemîn bû. Nêzîkahiyên Serokomar Erdogan ên pêvajoya muzakereyê tune hesiband, Mutabakata Dolmabahçeyê şaş dîtî, Heyeta Şopandinê nas nekirî û herî dawî gotina 'Pirsgirêka kurd tuneye' bi xwe re xitimandinekî mezin anî. Bi van gotin û polîtîkayan re li hemberî partiya me û xebatkarên me li her aliyê welat êrîş pêk hatin û ev yêk jî bû sedema diltirseyekî gelek mezin."

Heyet dibêje "di 7'ê pûşperê de gelê me li hemberî vê yekê seknekî dîrokî nîşan da" û wisa dom kir: "Ev hilbijartin nûjenkirina rojeva muzakere, çareserî û aştiyê ye.

Heyet da zanîn ku ew bi feraseta berpirsiyariya dîrokî ku hikumet bê xemsar nêzî pêvajoya çareseriyê dibe hewl dibin vê yekê ji holê karin û wiha got: "Birêz Ocalan ku mîmarê van hemû hewldanan e, helwesta tecrîdê ya li hemberî wî berdewam dike û çûyîna me ya Îmraliyê jî tê astengkirin. Bi vê yekê re li hemberî Rojava û Sûriyê gefên şer têne kirin, zimanê şer dike ku rewşa bêpevçûnan ji holê rabe. AKP ku ji bo koalîsyonê daxuyaniyên ku şer derdixin pêş, dawîlêanîna Pêvajoya Çareseriyê wekî şert nîşan dide, ev hemû nîşan didin ku li hemberî aştiya civakî alarmên şer lê didin."

Heyetê di dawiyê de wisa got: "Em wekî Heyeta Îmralî ya HDP'ê ki dixwazin siyaseta demokratîk li pêş be, hêviya me ew e ku Pêvajoya Çareseriyê bi aştiya mayînde bi dawî bibe. Ji bo vê yekê jî divê serê pêşî astengiyên li pêşiya heyeta me ku nahêlin em herin Îmraliyê bêne rakirin, tecrîda li ser Ocalan bê rakirin. Bi heman awayî bi lez mekanîzmayê muzakereyê bêne avakirin û Pêvajoya Çareseriyê di pêvajoya avakiriha hikumetê de wekî amûreke bazarê neyê bikaranîn."

Li ser vê yekê Heyetê bang li raya giştî, derdorên demokratîk kir ku berpirsiyarî bigirin ser milên xwe û zor li hikmet û dewletê bikin ku dest ji planên şer berdin.