KOBANÎ

Fermandariya YPG’ê ya Kobanê diyar kir ku di êrîşa hovane ya çeteyên DAIŞ’ê ya li ser Kobanî de, 233 sivîl, 2 endamên saziyên sivîl hatine qetilkirin. Fermandariyê destnîşan kir ku di pevçûnên derketine de 7 çete reviyane Tirkiyeyê, yek hatiye girtin û yên din jî hemû hatine kuştin. Fermandariyê got ku di pevçûnan de 21 şervanên YPG’ê û 14 endamên Asayîşê jî gihîştine şehadetê.

Vaye ew daxuyanî:

- 25’ê pûşpera 2015’an, di saetên sibehê de komeke çeteyan ku ji 80-100 kesan pêk tê, bi armanca ku jin, zarok, pîr û kal jî di nav de  li hemberî gelê sivîl komkujiyê pêk bînin, ketiye Kobanî.

- Ev koma çeteyan ji herêma Sirrin a li başûrê Kobanî, di rêyên veşartî re bi wesayîtên yek bi yek derbasî herêma Kobanî bûne û li cihekî vala gihîştine hev. Koma çeteyan li vir cilên Artêşa Azad lixwe kirine û bi alên Artêşa Azad ji noqteyên Asayîşê derbas bûne û ketine navenda Kobanî.

- Li gorî agahiyên ku ji çavkaniyên herêmî  hatine bidestxistin hinek komên çeteyan jî, ji sînorê Tirkiyeyê derbasî bajar bûne. Hinek şahidan jî bi çavên xwe dîtine ku hinek komên çeteyan, ji sînorê Tirkiyeyê derbas bûne.

- Komên çeteyan çawa ku ketine bajar, bi dehan jin, zarok, pîr û kal qetil kirine. Di heman demê de bi dehan mirovên sivîl jî rehîn girtine. Piştî ku komên çeteyan ketine bajar, hêzên YPG/YPJ’ê û Asayîşê li hemberî van çeteyan operasyonek berfireh daye destpekirin. Di roja 3’yemîn a operasyonê de piraniya çeteyan hatine kuştin, yek jî dîl hatiye girtin.

- Ji çeteyên ku ketine nava bajar, 7 endamên çeteyan reviyane aliyê Tirkiyeyê. 8 endamên çeteyan jî ber bi başûrê Kobanî ve reviyane. Di encama şopandina bi israr a hêzên me de, ji van çeteyên ku reviyane başûrê Kobanî 2 çete li herêma Termîk, 6 jî li herêma Korpîngarê hatine kuştin. Ji bilî 7 endamên çeteyan ên ku reviyane Tirkiyeyê, hemû endamên çeteyan ên ketine nava bajar hatine kuştin, çek û cebilxaneyên wan jî hatine desteserkirin.

- Sedema dirêjbûna operasyonê, bi hestiyarî tevgerkirina ji bo ewlekariya bi dehan sivîlên ku çeteyan rehîn girtine bû. Ji destpêka operasyonan ve bi dehan mirovên me yên sivîl ji aliyê hêzên me yên YPG/YPJ’ê ve, di encama xebateke baldarî û profesyonel de hatine rizgarkirin.

- Di van operasyonan de 7 rêhevalên me di nava bajar de, 3 hevalên me li gundê Berxbotan, 11 hevalên me jî di pevçunên bejahiya bajar a di çarçoveya heman êrîşê hatine jiyandin de bi lehengiyek mezin şer kirine û gihîştine şehadetê.

- Di encama komkujiyê de li gundê Berxbotanê 23, li navenda bajar jî 210 bi giştî 233 sivîl hatine qetilkirin û 273 sivîl jî birîndar bûne. Her wiha 14 endamên Asayîşê, endamekî TEV-DEM’ê, endamekî Yekîtiya Ciwanên Rojava şehîd bûne.

- Hevalekî me ê tirk heval Rifat (Karker Kobanê) ku eslê xwe arnawûd e, di berxwedana Kobanî de fedakariyên mezin kiriye û piştî rizgarkirina Kobanî jî bi awayekî aktîf tevlî xebatên ji nû avakirina Kobanî bûye. Hevalê me Rifat jî di vê komkujiyê de şehîd ketiye û bi şehadeta xwe bûye sembola biratiya gelên kurd, tirk û arnawûd.

- Em wekî Yekîneyên Parastina Gel (YPG) û Yekîneyên Parastina Jin (YPJ) careke din soz didin gelê xwe ku em ê tola hemû şehîdên xwe hilînin. Her wiha em eşkere dikin ku em ê hesaba vê komkujiyê bi awayekî pir giran ji çeteyan bipirsin.”

**

Nûçeyên eleqedar:

- Kobanî ji çeteyan hate paqijkirin 

- Ji du baskan êrîşên Kobanî kirine 

- HDP'ê 'êrîşên DAIŞ'ê ji hikumetê pirsî 

- DAIŞ'ê çima êrîş kir? 

- Mebûs çûn ser sînorê Kobanî 

- 'Ji bo Kobanî bibin mertalên zindî' 

- Çeteyên DAIŞ'ê ji Tirkiyeyê ketin Kobanî û sivîl qetil kirin