Diyarname
'Kovara Kurt' tarîhî ku hejmara xwe ya nû derxist di vê hejmarê de bal kişandiye ser mijara ku li Tirkiyeyê her mijara nîqaşê ye: Dêrsim û rewşa Dêrsimê.
Kovara "Kurt Tarîhî" du meha carekê bi tirkî derdikeve. Kovarê hejmara xwe ya 17'an a adar û avrêlê derxist. Kovara ku di her hejmarê de dosyayeke li ser beşek dîroka kurdan amade dike, di vê hejmarê de berê xwe daye Dêrsimê.
Mesela Dêrsimê li Tirkiyeyê her meseleya nîqaşê ye. Serokomarê Tirkiyeyê Erdogan bi meseleya Dêrsimê êrîşê Serokê CHP'ê dike bêyî ku lêborînek ji Dêrsimê bixwaze yan jî arşîvan veke ka çi bûye, çi nebûye. CHP li aliyek din e. Kurd li aliyê din. Niha kovara Kurt Tarîhî ku ji aliyê kurdan ve tê amadekirin û weşandin dest diavêje vê meseleyê. Dosya nîşan dide ku meseleya Dêrsimê ne tenê bi Komarê ve eleqedar e, berevajî ji berî Komara Tirkiyeyê de jî hebûye.
Di dosyayê de Şukru Aslan mijara "Bi rastî jî dewlet nedikarî bikeve Dêrsimê"; Cihangir Gundogdu mijara "Di raporên Dêrsimê yên serdema Ebdulhemîd de feraseta elewî/qizilbaş û siyaseta wê" girtiye dest.
Dilek Kizildag Soileau li ser "Ji nû ve liserfikirîna Dêrsima 38'an" sekiniye; Yalçin Çakmak jî bi awayê "Kurd, Kizilbaş, Komunîst yan jî Dêrsim di nav '3 K' de" mijar girtiye dest. Mehmet Bayrak jî bi nivîsa "Xeta Dêrsim-Xorasanê" di nav dosyayê de cih girtiye. Evrim Karakaş jî "Rapora Nirxandina Tevgera Dêrsimê ya Hêzên Hewayê ya Fransiz" pêşkêşî xwendevanan kiriye. Nivîskar Gurdal Aksoy jî bi sernavê "Bi Xizir nêrîna li dîroka çandê" keda xwe xistiye nav kovarê.
Ji bilî nivîsên dosyayê hin nivîsên din ên girîng jî di kovarê de cih girtine. Yek ji wan a Rohat Alakom e. Rohat Alakom li ser "Kurd di pêşangeha navneteweyî ya Viyanayê de ne (1873)" nivîsek nivîsiye û bal kişandiye ser pêşangeha wê demê ku Rusya, Îran û Osmanî cuda cuda cih dane kurdan.
Ayhan Kavak jî nêrîna Mewlena ya li kurdan girtiye dest.
Her wiha Nurillah Alkaç li ser pirtûka ferhengek nirxandina xwe, Vecdi Demir jî li ser pirtûka "Nameya Celadet Elî Bedirxan a ji bo Mustafa Kemal" nirxandina xwe kiriye.
Ji bo têkilî û xwestinê:
www.kurttarihi.org
0532 173 25 09
kurttarihi@yahoo.com