PARÎS
Hevseroka PYD’ê Asya Ebdullah ku ev çend roj in li Fransayê hevdîtinan pêk tîne, piştî hevdîtina bi Serokomarê Fransayê re, bi nûnerên partiyên siyasî, senator, saziyên civakî û rojnamegeran re hevdîtin pêk anî. Asya Ebdullah di hevdîtinê de qala sîstema Rojava û berxwedanê kir.
Hevseroka PYD’ê Asya Ebdullah derbarê hevdîtinên xwe de agahî dan ANHA’yê. Ebdullah destnîşan kir ku wan piştî hevdîtina bi Serokomarê Fransayê François Hollande re, duh jî li Şaredariya Bajarê Mezin a Parîsê bi parlamenterên Partiya Çep, Partiya Komunist, hinek senetorên meclisê, sazî û dezgehên ku Rojava dişopînin û dostên kurdan, her wiha gelek rojnamegeran re civînek lidar xistiye.
Asya Ebdullah got ku wan di civînê de wan pala sîstema Rêveberiya Xweseriya Demokratîk a ku li Rojava tê avakirin û li hemberî êrîşên hovane berxwedana ku tê meşandin, bi taybetî jî berxwedana Kobanî kiriye. Ebdullah piştre jî derbarê mijarê de bersiva pirsên rojnamegeran da.
Hevseroka PYD'ê Ebdullah û şandeya pê re wê îro jî ligel rêveberên Partiya Sosyalîst û Endamên Senatoya Fransayê hevdîtinê pêk bînin. Her wiha dê bi Wezareta Jinê re hevdîtin bê pêkanîn, lê dîroka wê nehat diyarkirin.