Amed

Hevseroka Komeleya Nivîskarên Kurd Remziye Aslan ligel endamên desteya rêveber hat serdana Hevşaredarê Bajarê Mezin ê Amedê Firat Anli û diyar kir ku ew dixwazin li Amedê pêşangeha pirtûkan li dar bixin.

TUYAP'ê biryar dabû ku ewê di sala 2015'an de li Amedê Fûara Pirtûkan li dar nexin*, di sala 2016'an de li dar bixin û êdî dê du salan carekê li dar bixin. Li ser vê yekê weşanxaneyên kurd ketin nava tevgerê. Komeleya Nivîskarên Kurd jî bêdeng nema. Hevseroka Komeleya Nivîskarên Kurd Remziye Aslan ligel endamên desteya rêveber Azad Zal, Mem Bawer û Erkan Yildirim çû serdana Şaredariya Bajarê Mezin û ligel Hevşaredar Firat Anli civînek li dar xist.

Di serdanê de Zal daxuyand ku Pêşangeha Pirtûkan a TUYAPê ku her sal meha gulanê li Amedê li dar ket, ji bo sala pêş hatiye betalkirin û biryar e ku vê pêşangehê du salan carekê li dar bixin. Zal, aşkere kir ku ew hem wekî nivîskar hem jî wekî xwendevan fêrî vê çanda fûarê bûne û wiha dom kir: “Îsal em dixwazin pêşangehê li dar bixin” û xwest ku vê fikra xwe bi Şaredariya Bajarê Mezin re parve bikin. Zal, eşkere kir ku ew dixwazin destpêkê li Amedê fûara pirtûkan li dar bixin û pêre jî li deverên din ên Bakur belav bikin.  

Hevşaredarê Bajarê Mezin ê Amedê Firat Anli jî destnîşan kir ku ew ji ber vê biryara TUYAP'ê dilgiran bûne û diyar kir ku divê şûna vê bê dagirtin. Anli wisa got, “Em dixwazin ji nav vê rewşa neyînî encamek erênî derxin Carinan deriyek tê girtin deriyek nû vedibe. Divê em wiha li vê yekê binêrin.” 

Anli got ku ew wekî Şaredariya Bajarê Mezin a Amedê ew ê piştgiriya lidarxistina fûara li Amedê bidin û got: “Em bi we re ne.” 

Anli daxwaz kir ku GABB (Yekîtiya Şaredariyên Başûrê Rojhilat) jî tevlê vê organîzasyona lidarxistinê bibe û da zanîn ku pêşangeha Amedê dê wêjeya vî erdî tevekê derxîne ser berikê.