Diyarname

Nivîskar Helîm Yûsiv ku ev nêzî salekê bû her hefte ji bo rojnameya Rûdawê qunciknivîskarî kir, Rûdawê vê hefteyê quncikê Helîm Yûsiv betal kir. Sedem derket holê ku Yûsiv van demên dawî zêdetir li ser Rojava û siyasetê dinivîsî

Çîroka nivîskar Helîm Yûsiv û rojnameya Rûdawê berî salekê dest pê dike. Par dema Helîm Yûsiv li Başûr beşdarî gotûbêjek dibe û gotara xwe ya li ser rojavaya Kurdistanê, jiyana wan a zarokatiyê dixwîne. Gotara wî gelek li xweşa berpirsê Rûdawê Ako Mihemed diçe û Mihemed vê gotarê werdigerîne soranî û diweşîne. Piştî vê yekê dema li Fûara Pirtûkana Frankfûrtê Helîm Yûsiv beşdarî bernameyeke wêjeyî dibe û Ako Mihemed jî li wir di nav temaşevanan de ye, piştî bernameyê bi hev re têkilî datînin û Yûsiv dest bi nivîsê dike. Ji wê rojê heta îro  hefteyê carekê ji bo Rûdawê binivîse. Yûsiv dest pê dike, bi zimanekî wêjeyî ji jiyana Rojava gotaran dinivîse. Carinan li ser wêjeyê, carinan tiştên serbest, lê piştî ku li Rojava şer gur dibe gotarên wî ber bi siyasî ve diçin. Û ji ber ku Helîm Yûsiv bi nasnameyê xwe yê azad, ji partiyan dûr, lê zêdetir nêzî rastiyê tiştinan dinivîse, her wiha rexne li hin siyasetan dike, ev yek li xweşa berpirsên Rûdawê naçe. Hefteya borî berpirsê Ewropayê bi e-mailekê Helîm Yûsiv agahdar dikin ku dê ew êdî nenivîse. Siyaseta ku Helîm Yûsiv dest avêtibû, xebata wî ya li televîzyona Ronahî jî dibe sedem ku Rûdaw quncikê wî rawestîne.

Dema Helîm Yûsiv ji berpirsên Ewropayê sedema betalkirina quncikê xwe ji wan dipirse, ew bersiva "Navendê ev ferman daye, em zêde nizanin."

Li ser vê yekê Helîm Yûsiv li berpirsê Rûdawê Ako Mihemed digere. Di nav axaftinê de Ako Mihemed dibêje "Me xwestibû tu li ser bîranînên xwe yên Rojava binivîsî, lê van demên dawî hemû nivîsên te bûne siyasî", Yûsiv jî bersiva "Ma niha dem dema bîranîna e. Li Rojava şer heye, rojname jî cihê entelektuelan e, ez çima li ser şer nenivîsim." Ako Mihemed gotina "Siyaset be emê bi hinên din bidin nivîsandin" û mijar tê girtin.

Bi gotina giştî, hem siyaseta azad ku Helîm Yûsiv diparast û di quncikê xwe de dinivîsand, her wiha di van demên dawî de di nîqaşên ku di Facebookê de derketin ku Helûm Yûsiv di binê nivîsê de wekî bersiv "Ez nikarim Rûdawê biparêzim" jî bûye sedema betalkirina quncikê wî. 

Bi kurtahî, Rûdawê ku bi gotina "weşaneke azad û serbixwe" dest bi weşanê kiribû, her ku diçe "azadbûn" û "bêlayaniya wê" eşkeretir dibe.