NAVENDA NÛÇEYAN

Yekîtiya Ragihandina Azad (YRA), diyar kir ku televîzyona Rûdaw li ser saziya wan nûçeyên ji rastiyê dûr weşandine.

YRA'yê daxuyaniyeke nivîskî weşand û diyar kir ku televîzyona Rûdaw li ser axaftinên nûçegihanê xwe yê bajarê Hesekê Ferhad Hemo der barê saziya wan de nûçeyên derew yên wekî, “YRA nûçegihanê Rûdawê ji avahiya saziyê derxistiye” weşandiye.

Di daxuyaniyê de hate destnîşankirin ku ev nûçe ji rastiyê dûr in, YRA ji hemû rojnamegeran re vekiriye û ev tişt gotin: “Di destpêka şoreşa Sûriyê de gelê Rojava saziyên xwe yên çandî û ragihandinê ava kirin, rojnameger û saziyên çapemeniyê jî xwe di bin siya saziya Yekîtiya Ragihandina Azad (YRA) de birêxistin kirin. YRA wekî saziyeke sivîl bi armanca ku hemû rojnameger karibin nêrînên xwe bi awayekî azad û serbixwe ragihînin hatiye avakirin."

Di daxuyaniyê de hate destnîşankirin ku her roj bi dehan rojnamegerên kurd û ereb ji hemû deverên Sûriyê serî li YRA’yê didin, sazî jî bi hemû derfetên xwe alîkariyên pêwîst dike.

Di dewama daxuyaniyê de bal hat kişandin ku li hemberî vê yekê nûçeyên nerast têne weşandin û wiha hate domandin:  “Cihê mixabiniyê ye ku qanala televîyona Rûdaw li ser zimanê nûçegihanê xwe yê bajarê Hesekê Fehad Hemo derbarê saziya me de nûçeyên derew weşandine. Rûdawê di nûçeya xwe de diyar kiriye ku, saziya me nûçegihanê wê pêşwazî nekiriye, karên wî asteng kirine û ew ji avahiya saziyê derxistiye. Lê nûçegihanê Rûdawê yê Hesekê Ferhad Hemo 3’yê rezber serî li saziya me daye, lêborîn xwestiye û diyar kiriye ku nûçeya Rûdawê weşandiye nerast e û wî ew agahî nedaye.”

Di daxuyaniyê de hate diyarkirin ku, Ferhad Hemo ji rayedarên Rûdawê xwestiye ku lîsteya navên xebatkarên televîzyonê yên li rojava Kurdistanê pêşkêşî YRA'ê bike, lê rayedaran hemû xebatkarên xwe bi gotinên wekî, “ger ku hûn bi YRA'yê bikevin nava têkiliyan em ê we ji kar bavêjin.”

Di dawiya daxuyaniyê de YRA'yê ji ber helwesta wî ya azad spasiya rojnameger Ferhad Hemo kir.

Ji ANHA'yê hatiye girtin