.jpg)
Di salên du hezarî di nav gengeşiyan de dihate gotin: “Berê kurdan li rojava ye lê ji ber li rojavayê kurdan tirk dijîn bandora wan a li ser kurdan ji ya serdestiya ereb û farsan zêdetir xuya dibe”. Gelo bi rastî berê kurdan li rojava ye?
Bi min çendîn rastiyek wê destnîşankirinê hebe jî, lê îro beşeke mezin a kurdan wê destnîşankirinê berovajî dikin! Wekî berê wan li rojava ye diaxivin lê di nava jiyanê de meriv dibîne ku berê wan ne li rojava li tirkan e.
Çima ne li ereban li farsan lê li tirkan? Cîraniya kurd û ereban, kurd û farsan diçe bi hezaran salan, lê ya bi tirkan re nêzî hezar salî ye. Gelo ji aliyê mirovî û şaristaniyê ve çi yê tirkan ji ya ereb û farisan pêşdetir e, ku ne ereb û fars lê tirk zêdetir bala kurdan dikşînin bandorê li kurdan dikin? Sedema vê yekê gelo bi rastî ji ber tirk li rojavayê kurdan in, an sedemeke derûniyî ya kurdan bi xwe heye?!
Em kurdên haya xwe ji xwe tuneyî, yanê yên nasnameya wan a neteweyî ne girîng, ango kurdên ne polîtîk bidin alikî; ku ji wan hin xwe parçeyekî tirkan dihesibînin, belkî tirk jî dihesibînin, qet nebe tirkan wekî birayê xwe yê mezin dibînin, lê yên wisa nabînin, ên xwe bi hişmend dihesibînin dibêjin haya me ji me heye û em dizanin tirk çi ne kî ne; yanê yên tînin zimên ku tirk neyarê kurdan in!
Ew girse bi mîlyonan e; girseyeke polîtîk û xwezan ku di devê wan de galegala kurdbûnê kêm nabe, ya ku derbarê pirsa berê kurdan li rojava ye de me dixe şikê!
Yên li bakur bi vî hawî ne kêm in, yên li bajarên tirkan dijîn ew jî wisa! Tew yên li ewropa, ango yên li navenda şaristaniya rojava ya modernbûnê dijîn; bi dehan salan in li wan deran in, di devê wan de zimanê tirkî seriyê wan de rojeva tirkan kêm nabe-nebûye...
Eger li parçeyên din rapisrînek were kirin; ‘hûn dixwazin bi ereban re yan bi farisan re bijîn an bi tirkan re’ encama rapirsînê li cem me tevan e!..
Ez bixwe ji vî wêneyî vê encamê derdixim; berê kurdan ne li rojava li tirkan e; tirk li rojava bin berê kurdan li rojava ye, li bakur bin ber li wir e, li başûr bin ber li wir e, li rojhilat bin ber li wir e!
Têkîliya kurd û tirkan têkîliyeke ecêb e, naşibe ya bi dagirkeriya ereb û farisan re! Belkî li cîhanê jî mînakên vê têkîliyê tune bin! Nizam ew zaafê kurdan ê li hemberî tirkan ji ku tê!?
Gelo dibe em berê xwe yê li tirkan bi rojava re tevlihev dikin?!
Qesta modernbûnê ne çarçoveya zemanê nû, di çarçoveya civakên gorî zemanê nû dijîne de ye û di wê çarçoveyê de çend pirsên derbarê modernbûna kurdan a bi şik;
1-kurd modern dibin an dibin tirk?
2-şêwaza modernbûna kurdan dişibe ya tirkan an dişibe ya rojavayiyan?
3-kurd di bin navê modernbûnê de, di sazî û dezgehên tirkan de xwendin, bûyîna xwedî kar û pîşe modern dibin an tevlî plansaziyên tirkan a tirkkirinê dibin?
4-rojavayîbûn bi plansaziya kurdan pêk tê yan kurd jî di nav a tirkan de dimeşin?
5-gelo dibe ku bi armanca rojavayîbûnê em kirasê tirkbûnê li xwe dikin, an li me tê kirin?
6-eger berê kurdan li rojava ye ne li tirkan e, gelo ji siyasetê, sazûmaniya civakî, mode, dirûv, huner, rêbaza hizirînê, hişmendî û wekî dinên me çima ne wekî ya rojavaya rasteqîn lê wekî teqlîd û kopyeyên tirkan in xwe dinimînin?
7-dema em dibên jina kurd a modern, mêrê kurd ê modern an derdora kurd a modern, gelo em wê modernbûnê dişibînin a ku, yan a ku tê ber çavê me?
8-gelo dibe ku qesta kurdan a ji modernbûnê-rojavabûnê xwe gihandina asta tirkan be?
9-li gorî kurdan, gelo şaristanî û modernbûneke tirkan heye yan na?
10-eger ku bersiva pirsa jor na be, ê nexwe çima meriv di navbera kurd û tirkan de pir cudahiyekê nabîne? Çiku pirrr tiştên kurdan ên li ser navê modern xuyabûnê naşibin ên rojavayiyan dişibin yên rojavabûyîna sexte ya tirkan!
Wer xuyaye ji mêtîngerên kurdan tirk ên herî serkeftî ne; bi awayekî dikevin-ketine nav rihê çi ligel çi dijber ê kurdan!
Lê eger bersiva pirsên li jor, berê kurdan ne li rojava li tirkan be; sedem kifş e, çiku ew serdestê kurdan in, gelek asayî ye ku di rewşa bindestiyê de destê tirkan di teşegirtina kurdan de hebe.
Qasî pir kesan jê bi hay im, di rewşa bindestiyê de şibîna serdest kambaxiya bindestan e.
Dîsa jî pirs e; gelo dirûvê modernbûna me şikl û dirûvê kê dide? Yê rojava, yan em wêneyekî tirkan dinimînin?
.jpg)
