Cemil Oguz

Ji bo guhdarîkirinê:
 

Bifikirin ku helbest wisa hatiye nivîsandin; 
“Her du memikê min ê girover nava devê te kira
Bikişiya şîr û hinguv, te dil û can tehm kira
Me êvarê heya sibê, xewa şîrîn nekira
Bedewiya min delalê te yê wê gavê fehm kira”
Lê tu guh didî stranê, beşa “Her du memikê min ê girover nava devê te kira” têde nîn in.
Çima?
Em qal bikin.
Gotinên stranê, bi awayê din helbest ji aliyê Ayhan Demir ve hatiye nivîsandin. Tara Mamedova niha ew helbest wekî stran bi navê “ZERÊ” pêşkêş kiriye. (1) Û sansura li ser memikên Zerê jî li vir dest pê kiriye.
Dema min guh da strana ku Tara Mamedova deng, rih û can daye gelek kêfa min jêre hat. Straneke xweş çêbûye. Lê ev sansur ji ku hat?
Em hinek din binêrin:
Ez ketim nava cîhana înternetê, min “got ka çi li ser heye?”
Min dît ku piştî Ayhan Demir helbesta xwe belav kiriye, Welat Bazîdî helbesta wî bi helbestkî xwendiye û li ser youtube (2) belav kiriye. Dûre min dît ku hunermendê mezin Dilovan bi ûda xwe û li ber dengê bilûra Hekîmo helbest kiriye stran û stra ye. (3)
Hunermend Tara Mamedova jî bi ser vegotina Dilovan re stran girtiye, ji nû ve û bi awayekî serketî hona ye. Lê mixabin li vir bivir li “memikên Zerê” xistiye û ew nexwendiye; belkî jî nexwestiye bixwîne. Lê di strîna Dilovan de ew beş heye.
Ez hez ji hunermend Tara Mamedova dikim. Bi ya min yek ji hunermendên me yên serketî ye. Her ku strana “Zerê” ye, gelek xweş gotiye, loma min got deng, rih û can daye. Lê xwezî ew beş sansur nekira. Helbet hunermend azad in, dikarin ji helbestên dirêj beşek jê bigirin û bikin stran. Helbet di vir de razîbûna helbestvan jî divê hebe. Di meseleya “memikên Zerê” de hêja Tara Mamedova ji helbestvan pirsiye yan na ez nizanim, lê dîsa dibêjim; xwezî hêja Mamedova ew beş sansur nekira.
Çima?
Ji ber ku ew hestên jinekê ne. Ew bixwebaweriya jinekê ye ku dibêje, “Her du memikê min ê girover nava devê te kira / Bikişiya şîr û hinguv, te dil û can tehm kira”… Dîsa ev beş beşeke serketî, beşeke xweş, beşeke girîng a helbestê ye.
Ew beş beşeke wêrek ji pênûsa helbestvan derketiye. Rengê helbestê, rihê helbestê ye.
Axir. Sansur li memikên Zerê ket û çû jî. Bila canê Tara Mamedova jî, ya Dilovan û Ayhan Demir jî sax be. Dilovanê ku me ji gelek stranên wî hez dikir, em hez dikin jî, Tara ya em her guh didinê jî bila her hebin. Û miheqeq li “Zerê”ya Dilovan jî, ya Tara Mamedova jî guhdarî bikin.

*
NOT: Lînka youtubeyên wan datînim vir, yên bixwazin dikarin guhdarî bikin.
1- Tara Mamedova “Zerê”
https://www.youtube.com/watch?v=N41FIS6udxA
2- “Zerê digot”, xwendin Welat Bazîdî
https://www.youtube.com/watch?v=6Qdx79J55fM
3- “Zerê digot”, Dilovan
https://www.youtube.com/watch?v=qdA5zHn6GeA

*

NOT 2: Ji awayê dilovan xwendiye min deşîfre kir. Ji bo yên bixwazin binêrin:
 

ZERÊ DIGOT

Zerê digot kuro gede tu bihita li vira
Ezê dora te bizivirim, bibim roj hîv û çira
Bêjim dilo, bêjim lo lo, xwezî min şerm nekira
Dest biavêta wan pişkokên pêsîra xwe vekira
Her du memikê min ê girover nava devê te kira
Bikişiya şîr û hinguv, te dil û can tehm kira
Me êvarê heya sibê, xewa şîrîn nekira
Bedewiya min delalê te yê wê gavê fehm kira
Bedewiya min kubarê te yê wê gavê fehm kira

Tu bi tilikên xwe yên nazik biskên zerîn şekira
Lêvên min ê mîna kaxez wek qelemê reş kira
Dest bavêta kolanê mil bi ser xwe de kaş kira
Ramûsanên te yên dijwar sîngê sedef nexş kira
Tîra eşqê li te xista serxoş fir û feşkira
Min pir dixwest carek ji caran dilê melûl geş kira

Ev çend sal e tu dinalî birînên te baş kira
Guhê te da min bistira wek dergûşan aş kira
Kuro gede xwezila me heba eşqê har kira
Serê Zerê bi qurbano agirê dila sar kira