Extiyarek li ber mirinê dê bînin wê derê û dibêjin kêf bikin? Ka emê çawa bikin?!
4'ê avrêlê dest bi darizandina derbekar Kenan Evren kirin.
Em bibêjin cezayeke giran bidin Kenan Evren dê di nav jiyana kurdan de şoreşeke çawa pêk bê? Jiyana kurdan dê çiqas xweştir bibe?
Ka em pêşî hin agahiyan rûberî hev bikin:
- 12.09.1980: Zagona Bingehîn (ji aliyê Kenan Evren û rêveberiya wî ve) hate nivîsandin.
2012: Ev zagon hê li ser kar e, hê jî li gor vê zagonê kurdan qebûl nakin.
- 12.09.1980: Bendava Hilbijartinê wekî Sedî 10 hate danîn, niha jî ev bendav heye û pêşî li partiya kurdan digire ku neçin meclisê.
Erê bi 'Serbixwe'yan kurd dîsa ketin meclisê lê bendav tuneba, wekî partî biketana meclisê, dê Wekî AKP, CHP, MHP'ê ji xezîneyê pere bigirtana. Ew pereyên ku ev partî ji wir digirin têrî çend partiyan dikin, lê BDP û kurd ji vê bêpar in.
- 12.09.1980: 98 hezar kes bi "endamtiya rêxistinê" hatin sûcdarkirin.
2011: 86 hezar kes ji Aliyê Dadgehên Bi Rayeya Taybet (Hûn dikarin wekî DGM-Dadgeha Ewlehiya Dewletê jî bixwînin. Û sedî 90'ê evên ku hatine darizandin jî kurd in) ve hatin darizandin.
- 12.09.1980: Ji bo 400 rojnamegerî bi giştî 4 bin hezar sal cezayê hepsê hate xwestin.
2012: Di serî de Berpirsên Karên Nivîsaran ên rojnameya Azadiya Welat ji bo gelek rojnamegerî bi sedan salan cezayê hepsê tê xwestin.
- 12.09.1980: Rojname hatin girtin û rojnameyan 300 roj weşan nekir.
2012: 30 roj cezayê girtinê li rojnameyê hate birîn.
- 12.09.1980: Rojnamegeran nediwêrî rastiyê binivîsin.
2012: Niha jî rojnameger newêrin rastiyê binivîsin û otosansurê dikin. Yên wêrek jî têne qewirandin. (Ji Milliyetê Nuray Mert, ji Haberturkê Ece Temelkuran, ji NTV Ruşen Çakir, Can Dundar, Banu Guven, Mirgun Cabas hin ji wan kesan in ku ji kar hatine dûrxistin.)
- 12.09.1980: YOK (Saziya Hîndekariya Bilind) hate avakirin, êdî zanîngeh li gor derbeyê tevdigeriyan. Ciwan li gor feresata derbekaran hatin gihandin.
2012: YOK hê heye û ne xwendekar dikarin gotinek bibêjin, ne çalakiyan li dar bixin. Yên ku gotinek dibêjin, yan çalakiyek dikin ji ber sedemên ne tu sedem têne girtin. (Di destpêkê de AKP'ê her digot dê YOK'ê rakin lê piştî zilamê xwe kirin Serokê YOK'ê dest ji vê gotinê berdan)
- 12.09.1980: Li Tirkiyeyê perwerdehî tenê bi tirkî tê kirin.
2012: Hê jî ji perwerdehî heta 'tekbûn'ê her tiştê bi tirkîtî re girêdayî di Zagonê de ye û rewş wisa dimeşe. Kurd bi awayekî fermî tune ne, nikarin perwerdehiyê bibînin.
- 12.09.1980: Leşker bi rehetî ha li bajêr, ha li gund û navçeyan ku bixwazin dikarin bavêjin ser wê derê, kî bixwazin dikarin bigirin, bikujin û kes nikare ji wan hesabê bipirsin.
2012: Ne berpirsê Roboskî, ne berpirsên kuştina Ceylana ji Licê, zarokên li Wanê hatine dîtin. (Ger berpirsên van jî eynî wekî Evren, piştî 30 salan berpirsên van bûyeran bêne darizandin dê çi bibe? Gotina "Edaleta ku dereng bê ne tu edelat e" careke din dibe serdest)
- 12.09.1980: Derbe çepgiran, rastgiran digire bin çavan, lê rê li ber oldaran vedike.
2012: Çepgir wekî her gav têne binçavkirin, kurd têne binçavkirin û girtin û helbet dîsa rê li ber oldaran hatiye vekirin.
- 12.09.1980: Bi sedan/hezaran xwendekar hatin girtin.
2012: Li gor Platforma Piştgiriya XWendekarên Girtî niha 500 xwendekar girtî ne.
Û gelek tiştên din.
Dema ev tişt û gelek tiştên wisa hê li ser kar bin, dema tu mafê gotineke kurdan nîn be ka emê çawa bi darizandina derbekar Kenan Evren kêf bikin?
Bi gotineke din: Niha cezaya hepsê bidin Evren û wî bavêjin hepsê dê çi biguhere?
Darizandina Evren dê çi şoreşê di nav jiyana kurdan de pêk bîne ka hûn bibêjin...
Ger hûn dixwazin em kêf bikin, hûn dixwazin em ji bo we li çepikan xin, wê çaxê pêşî Zagona Partiyên Siyasî biguherînin û bendava Sedî 10'ê ku li tu welatê Ewropayê tuneye biguherînin.
Paşê rê li ber kurdî vekin.
Dûre ji her derê, ji her saziyê zihneyata (feresata) Derbeyê ji holê rakin ku em bizanibin tevgera ku tê kirin tiştek rast e.
Wê çaxê werin emê hemû bi hev re kêf bikin.
Wekî din, bila kesên ji derbeyê raste rast cefa dîtine biborin lê heta zihniyeta derbeyê serdest be, li ser navê xwe ez bibêjim tu kêfa min nayê.
.jpg)
